Elimizdiń kóptegen meditsinalyq uiymdary dári-dármekti qasaqana qymbat baǵaǵa satyp alyp otyrǵan. Bul týraly búgin Ortalyq kommýnikatsiialar qyzmetindegi baspasóz máslihatynda QR Densaýlyq saqtaý ministrligi Farmatsiia komitetiniń tóraiymy Liýdmila Buirabekova málim etti, dep habarlaidy QazAqparat tilshisi.
Onyń aitýynsha, QR Densaýlyq saqtaý ministrliginiń 2018 jyldyń qortyndysyna arnalǵan keńeitilgen alqa májilisinde jariia etilgen derekterge sáikes vedomstvo Eljan Birtanovtyń tapsyrmasymen elimizdiń 70 meditsinalyq mekemesindegi dárilik zattardy utymdy paidalanylýyna, psihiatriialyq, onkologiialyq aýrýlarmen, AITV/JITS jáne týberkýlezben aýyratyn naýqastardy dárilik zattarmen qamtamasyz etý barysyna taldaý monitoringi júrgizilgen.
«Monitoring nátijesinde qajettiliktiń artyq qalyptasýy, naýqastardyń dárilik zattarmen tolyq kólemde jáne turaqty qamtamasyz etilmeýi, dári-dármektiń tiimsiz paidalanylýy derekteri anyqtaldy», - dedi komitet tóraiymy.
L.Buirabekovanyń monitoring barysynda anyqtalǵan barlyq derekter shara qabyldanýy úshin elimizdiń Bas prokýratýrasyna jiberilgen. Sonymen qatar qazirgi ýaqytta QR DSM Farmatsiia komitetiniń aýmaqtyq departamenteri ókilderiniń qatysýymen aimaqta monitoringtiń einshi kezeńi júrgizilip jatyr.
