Meditsina mamandyǵyn oqyp jatqan stýdentterdiń shákirtaqysy 25 paiyzǵa artady. Bul týraly búgin QR Densaýlyq saqtaý ministri Aleksei Tsoi aitty, dep habarlaidy QazAqparat.
«Meditsina qyzmetkerleriniń biliktiligin halyqaralyq standarttarǵa sáikes deńgeige jetkizý úshin kelesi is-sharalar josparlanǵan: bilim berý qyzmetteriniń qunyn qalyptastyrýdyń jańa ádistemesin engizý, memlekettik bilim berý granttaryn 40 paiyzǵa ulǵaitý, meditsinalyq joǵary oqý oryndarynyń professor-oqytýshy quramynyń biliktiligin arttyrý, meditsina JOO-lary stýdentteriniń shákirtaqysyn 25 paiyzǵa kóterý», - dedi Aleksei Tsoi Densaýlyq saqtaý ministrliginiń keńeitilgen alqa otyrysynda.
Sonymen qatar ministr PhD doktorlaryn daiyndaýdyń jańa baǵdarlamasyn ázirlep, engizý, meiirbike qyzmeti qyzmetkerlerin mamandandyrý qolǵa alynatyndyǵyn aitty.
«Otandyq ǵylymdy damytý úshin Open Access biomeditsinalyq zertteýler tizimin iske qosýdy jáne «biryńǵai tereze» arqyly klinikalyq zertteýler jónindegi úilestirý ortalyǵyn qurýdy josparlap otyrmyz», - dedi ol.
