29 naýryzda Stambýlda ótken kelissóz kezinde Ýkraina Reseidiń "negizgi talaptarymen" kelisti. Sársenbi kúni Resei delegatsiiasynyń jetekshisi Vladimir Medinskii osylai dep málimdedi.
Medinskiidiń sózine qaraǵanda, Ýkraina jaǵy Reseimen kelisýge daiar ekenin alǵash ret málimdegen. Resei talaptarynyń arasynda Ýkrainanyń NATO-ǵa qosylýdan bas tartýy, Ýkrainaǵa shetel áskeri bazasyn shoǵyrlandyrý men áskeri kontingentti ornalastyrmaý, kepil memleketterdiń (arasynda Resei de bar) kelisiminsiz áskeri jattyǵý ótkizbeý siiaqty talaptar bar.
"Eger bul sharttardyń barlyǵy oryndalsa, onda Ýkraina aýmaǵynda NATO platsdarmyn ornalastyrý qateri joiylady" dedi Medinskii. Onyń aitýynsha, taraptar Qyrym men Donbass máselesi boiynsha kelisimge kelmegen.
Medinskii "Ýkraina usynystary Resei talaptaryna sáikes keledi" dep aitqanmen, Máskeý áý basta, Ýkrainaǵa soǵys asharda Kievke basqa talaptar qoiǵan. Resei basqynshylyǵy bastalar tusta prezident Vladimir Pýtin "áskeri operatsiianyń" maqsaty Ýkrainany "denatsifikatsiia" jáne "demilitarizatsiialaý" dep málimdegen. Máskeý sonymen birge Kiev Qyrym anneksiiasy men Donbastaǵy "halyq respýblikalarynyń" táýelsizdigin moiyndaýy tiis degen.
Al Stambýlda Ýkraina taraby bergen usynystar arasynda demilitarizatsiia jáne denatsifikatsiia jóninde sóz joq, Kiev territoriia tutastyǵynan bas tartpaitynyn málimdegen. Kiev tek Qyrymnyń statýs-kvosyn taǵy 15 jylǵa sozýmen kelisken. Osy ýaqyt aralyǵynda Máskeýmen onyń ári qaraiǵy taǵdyryn talqylaýdy usynǵan.
Vladimir Pýtin Ýkraina usynysyna bailanysty túsinikteme bermedi. Resei syrtqy ister ministri Sergei Lavrov sársenbi kúni kelissózde "edáýir ilgerileýshilik" baiqalǵanyn aityp, ýkrain delegatsiiasy Qyrym men Donbass máselesiniń "túbegeili sheshilgenine" túsinistik tanytty dep málimdegen.
Al Ýkraina syrtqy ister ministrligi Lavrovtyń málimdemesin joqqa shyǵardy. Vedomstvo túbegeili sheshim "Ýkraina egemendigi qalpyna kelgennen keiin" bolatynyn aitty.
Stambýldaǵy kelissózdiń nátijesine túsinikteme bergen Ýkraina delegatsiiasynyń músheleri jáne prezident Vladimir Zelenskiidiń aitýynsha, Ýkraina usynystary qabyldansa, memleket qaýipsizdik kepildigine ie bolady. Kiev Ýkraina territoriiasynan, onyń ishinde Qyrym men Donbastan bas tartpaitynyn jáne Resei áskerin alyp ketkennen keiin ǵana kelisimge qol qoiatynyn aityp otyr.
Kelesi kelissózdiń qashan ótetini belgisiz. Ýkrainada soǵys áli toqtamady.
