QR Ulttyq olimpiada komiteti sport direktsiiasynyń direktory Elsiiar Qanaǵatov qysqy Olimpiadaǵa qatysyp jatqan qazaqstandyq sportshylardyń nátijesi týraly pikir bildirdi, dep habarlaidy QazAqparat.
«Áli de alda jarystar bar, qalashyqta sportshylarǵa bar jaǵdai jasalǵan. Biz de óz kómegimiz ben qoldaýymyzdy kórsetýge tyrysyp jatyrmyz. Sondyqtan, jankúierlerge rahmet, sportshylardy jigerlendirip otyrsańyzdar, basqa eshteńe qajet emes», - dedi Elsiiar Qanaǵatov ZOOM alańynda ótken baspasóz máslihatynda.
Spikerdiń aitýynsha, sportshylardyń nátijesine boljam jasaý qiyn.
«Táýelsizdik alǵaly qysqy Olimpiada oiyndarynda bar bolǵany 8 medal jeńip alǵanbyz, onyń tórteýin jalǵyz Vladimir Smirnov alǵan. Medal ielený ońai sharýa emes. Fristail-mogýl boiynsha kóptegen elderde birneshe sportshy ǵana biliktilik alady. Al bizdiń elden tórt sportshy oiyn kórsetti. Menińshe, bul da jaqsy jetistik. Árine, alda áli talai oiyn bar. Biz úzdik ondyqqa enýge tiis sportshylardyń esimderin birneshe ret atadyq. Biz sizderdi qýantýǵa daiynbyz. Bul salanyń mamandary qysqy sport túrleriniń deńgeii týraly jaqsy biledi. Elordada konkimen júgirý sporty boiynsha tek «Alaý» muz saraiy ǵana jumys isteidi. Osyǵan qaramastan, bizdiń sportshymyz álem chempionatynda ekinshi oryn aldy», - dedi Qanaǵatov.
