Soltústik oblystardy gazdandyrý jónindegi normativtik erejelerge tiisti ózgerister engizý kerek. Bul týraly Májilistiń jalpy otyrysynda depýtat Jambyl Ahmetbekov málim etti, dep habarlaidy "Ult aqparat".
«Sońǵy jyldary elimiz boiynsha qarqyndy túrde júrgizilip jatqan gazdandyrý máselesi, halyqtyń áleýmettik jaǵdaiyn kóterýge áser etetin úlken de mańyzdy shara bolyp otyr. Májilistegi QHP fraktsiiasyna belgili sarapshy-ǵalymdardan kelip túsken usynystarda keibir normativtik qujattardaǵy gazdandyrýǵa kedergi keltirip otyrǵan qaishylyqtardy ashyp berdi. Ǵalymdardyń pikirinshe, Qazaqstan Respýblikasynyń Úkimetiniń 2020 jylǵy 24 qarashadaǵy sheshimine «Sary-Arqa» magistraldyq gaz qubyrymen gaz jetkizý, soltústik oblystardy gazdandyrý jónindegi normativtik erejelerge tiisti ózgerister engizý qajettiligi týyndap otyr», - dedi depýtat Indýstriia jáne infraqurylymdyq damý ministri Beibit Atamqulovqa joldaǵan saýalynda.
Onyń aitýynsha, elimizdiń soltústik oblystary men Nur-Sultan qalasynda aiaz –40 gradýsqa, keide -50-ge jetedi. Al bul jaǵdai qoldanystaǵy normalar men erejelerde eskerilmegen. Tájiribe kórsetip otyrǵandai, qysymdy rettegishterdi, gazdy esepke alý quraldaryn abonentke 2 satyly shema boiynsha ashyq jerde ornatyp berý ońtústik oblystardyń klimattyq jaǵdailarynda ǵana qoldanýǵa bolady.
«Bul qujattardaǵy ónimder, gaz qysymyn rettegishter men gaz esepteýishter 2 satyly shemalyq ornatýǵa soltústik óńirlerdiń aiazyna shydamaidy. Sebebi mundaǵy negizgi komponentter eýropalyq standarttar boiynsha jasalady, olar –25°c-ǵa deiin synaqtan óte alady. Sondyqtan osy ónimderdi importpen ákeletin óndirýshiler, bul ónimderdiń qatty aiazda jumys istei alatyndyǵyna kepildik bermeidi. Eger –35 jáne –40 gradýs aiaz bolsa, bul ónimder isten shyǵady. Qoldanystaǵy normativtik qujatqa ózgerister engizý qajettiliginiń mańyzdy bir faktory ekonomikalyq qajettilikten týyndap otyr. 2 jáne 3 satyly shemalyq gaz taratý júiesiniń ártúrli nusqalaryna taldaý júrgizilgen kezde, qalalar men iri eldi mekender úshin 3 satyly shemasy neǵurlym tiimdi ekendigin kórip otyrmyz. Iaǵni, ol gazdy abonentterge úige kirgizip montajdaý degen sóz. Ókinishke qarai, osy shemalaryn tańdaýdy retteitin qoldanystaǵy normativtik qujattarda bir-birine qarama-qaishy keletin tustary bar», - dep toqtaldy J. Ahmetbekov.
Osy aitylǵandardy eskere otyryp, normativtik qujattarǵa engizýge mynalar usynyldy:
1. Jeke tulǵalardy gaz qubyrlaryna qosýǵa arnalǵan tehnikalyq sharttardy jasasý kezinde, bul qyzmettiń qunyn jobada aldyn ala eskerý jáne ony barynsha ońtailandyrý;
2. «Aqyldy eseptegishterdi» satyp alýdy, montajdaýdy jobalyq sheshimderge engizýdi «Tsifrlyq Qazaqstan» memlekettik baǵdarlamasynyń aýqymyna engizý jáne olardyń qunynyń sipattamalaryn birizdendirý;
3. Halyqqa túsetin qarjylyq júktemeni azaitý úshin «aqyldy eseptegishterdi» satyp alýǵa jáne ornatýǵa arnalǵan shyǵyndardy tapsyrys berýshiniń qarajaty esebine jatqyzý.
