Májilisi tóraǵasynyń orynbasary Balaiym Kesebaeva múmkindigi shekteýli jandar qandai problemalarǵa tap bolyp otyrǵanyn aitty, dep habarlaidy QazAqparat.
«Keiinge qaldyrmai sheshýdi talap etetin birqatar másele bar, óitkeni olar halyqtyń eń qorǵalmaǵan ári osal toptaryna qatysty – bul múmkindigi shekteýli adamdar, onyń ishinde balalar. Múmkindigi shekteýli azamattarymyzdy áleýmettik qorǵaý Konstitýtsiiamen, «Qazaqstan Respýblikasynda múgedekterdiń áleýmettik qorǵalýy týraly» Zańmen retteledi. Sonymen qatar, áleýmettik qorǵaýǵa, onyń ishinde ońaltýǵa, qoǵamǵa kiriktirýge, kez kelgen qyzmetti, onyń ishinde eńbek qyzmetin erkin tańdaýǵa, kásiptik daiarlaýǵa jáne qaita daiarlaýǵa, eńbek qabiletin qalpyna keltirýge ári jumysqa ornalasýǵa, Qazaqstan Respýblikasynyń turǵyn úi zańnamasyna sáikes turǵynjaiǵa quqyqtar jáne budan da basqa da quqyqtar belgilenetin ózge de zańdarmen retteledi. Alaida, is júzinde múmkindigi shekteýli jandar óz quqyqtaryn júzege asyrý barysynda birqatar problemalarǵa tap bolady», - dedi depýtat Parlament Májilisinde áleýmettik qorǵaý máseleleri týraly zań jobasynyń tanystyrylymyna arnalǵan jiynda.
Onyń aitýynsha, múmkindigi shekteýli balalardyń baspana alý máselesi bar. Eger múgedek bala 18 jasqa tolǵanǵa deiin turǵyn úi alynbasa, otbasy kezekke qaita turýǵa májbúr bolady, osylaisha kútý merzimi kóbeiedi.
«Múgedek adamdardyń jumysqa ornalasýy da qiyn is. «Halyqty jumyspen qamtý týraly» Zańyna sáikes, jergilikti atqarýshy organdar aýyr jumystardy, eńbek jaǵdailary ziiandy jáne qaýipti jumystardaǵy jumys oryndaryn eseptemegende, jumys isteitinderdiń jalpy sanynyń 2-den 4 paiyzǵa deiingi mólsherinde múgedekter úshin jumys oryndaryna kvota belgileidi. Qazirgi ýaqytta, Eńbek jáne halyqty áleýmettik qorǵaý ministrliginiń aqparatyna sáikes, kvota 4% quraidy jáne 70 myń adam úshin belgilengen. Alaida, kvota aiasynda barlyǵy 15 myń múmkindigi shekteýli jan nemese paiyzy jumysqa ornalastyryldy», - dedi B. Kesebaeva.
Onyń sózine qaraǵanda, múmkindigi shekteýli adamdardy ózderine laiyqty jumysqa ornalastyrý úshin jumys berýshilerdiń kóbirek nazar aýdarýyn mindetteitin nemese yntalandyratyn qosymsha sharalar qajet.
«Sonymen qatar, ońaltý, qoǵamǵa kiriktirý, áleýmettik qoldaý sharalary boiynsha kórsetiletin qyzmetterdiń jetildirilmeýine bailanysty problemalar da bar. Budan basqa, 1-toptaǵy múgedektik berilgen aýyr naýqas adamdardy kútip-baǵýdy júzege asyratyn adamdar áleýmettik qoldaý sharalarymen jetkilikti qamtylmaǵan. Búgin qaralyp otyrǵan zań jobasynda osy máselelerdiń belgili bir sheshimderi usynylady, sonyń nátijesinde múgedek balalar úshin, múgedek balalary bar otbasylar men asyraýshysynan aiyrylǵan otbasylar úshin járdemaqy mólsherin ulǵaitý, birinshi toptaǵy múgedekterge kútim jasaityn adamdar úshin jańa járdemaqy engizý eskerilip otyr», - dedi depýtat.
