Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine aqparat máseleleri boiynsha ózgerister men tolyqtyrýlar engizý týraly» zań jobasy maquldandy, dep habarlaidy "Ult aqparat".
QR Aqparat jáne qoǵamdyq damý ministri Aida Balaevanyń aitýynsha, ózgerister eki negizgi mindetti sheshýge baǵyttalǵan. Birinshiden, baqylaý men jaýapkershilikti kúsheitý, iaǵni aqparatqa qol jetkizý salasyndaǵy jaýapty ókiletti organdy anyqtaý men onyń quzyretin aiqyndaý eskerilgen.
Sondai-aq, árbir memlekettik organda ókiletti qurylym nemese osy saladaǵy jaýapty qyzmetkerdi belgileý usynylady.
Ekinshiden, zańnyń qoldanys aiasyn keńeitý úshin memlekettik fýnktsiialardy oryndaýshy uiymdardy aqparat ieleri qataryna jatqyzý jáne kvazimemlekettik sektor men basqa da uiymdardy ashyq derekterdi jariialaýǵa mindetteý usynylady.
«Zań jobasyna otandyq BAQ-tyń básekege qabilettigin arttyrý boiynsha birqatar túzetýler engiziledi. Osy oraida memlekettik aqparattyq saiasattyń biryńǵai júiesin qurý eskerilgen. Ol úshin salalyq vedomstvoǵa respýblikalyq jáne óńirlik deńgeidegi memlekettik aqparattyq tapsyrysty ornalastyrýdyń biryńǵai tártibin aiqyndaý boiynsha ókilettik berý usynylady. Memlekettik aqparattyq saiasatty qalyptastyrý jónindegi respýblikalyq jáne óńirlik komissiialardyń mártebesin zań júzinde bekitedi. Onyń quramyna úkimettik emes uiymdar, buqaralyq aqparat quraldary jáne memlekettik organ ókilderi teń dárejede engiziletin bolady», - dep túsindirdi A. Balaeva.
