QR Parlamenti Májilisiniń jalpy otyrysynda «Iadrolyq qarýǵa tyiym salý týraly shartty ratifikatsiialaý týraly» zań jobasy maquldandy, dep habarlaidy QazAqparat tilshisi.
«Shart buryn tyiym salynbaǵan jappai qyryp-joiý qarýlarynyń sońǵy túri - iadrolyq qarýǵa zańdy turǵyda tyiym salatyn tarihtaǵy alǵashqy halyqaralyq qujat bolyp sanalady. Óz kezeginde iadrolyq qarýǵa zańdy turǵyda tyiym salý - iadrolyq qarýdyń tolyq joiylýy úshin qajetti alǵashqy qadam retinde qastyrylyp otyr. Shart iadrolyq qarý nemese iadrolyq jarylǵysh qurylǵyny óndirý, synaý, satyp alý, berý, saqtaý jáne óz aýmaǵynda ornalastyrýǵa tikilei tyiym salady. Sonymen qatar, sharttyń erejelerine sáikes, iadrolyq qarýdy paidalanýǵa ári qoldaný turǵysynan qorqytýǵa tyiym salynǵan», - dedi QR Syrtqy ister ministriniń orynbasary Erjan Ashyqbaev.
Onyń sózine qaraǵanda, atalǵan shart 2017 jylǵy 20 qyrkúiekten bastap Niý-Iorktegi BUU Bas Assambleiasynyń 72-sessiiasy aiasynda qol qoiylýy úshin ashyldy.
Sonymen qatar, 50 memleket ratifikatsiialaǵannan keiin kúshine enetin bolady. Qazirgi ýaqytta shartqa 70 memleket qol qoidy, 23 memleket ratifikatsiialady. Baǵamdar boiynsha sharttyń kúshine enýi 4-5 jylǵa sozylýy múmkin.
«Elbasy Nursultan Nazarbaevtyń 2045 jylǵa qarai iadrolyq qarýsyz álem qurý ideiasy sózsiz Qazaqstannyń basty syrtqy saiasi bastamalarynyń biri bolyp sanalady. Sharttyń tez arada kúshine enýine járdemdesý - bul joǵary mindetke qol jetkizýdiń mańyzdy elementteriniń biri. Qujatty qabyldaý iadrolyq qarýsyzdaný úrdisinde kóptegen jyldarǵa sozylǵan toqyraýǵa jáne iadrolyq derjavalardyń bul másele boiynsha ortaq pátýa taba almaýyna jaýap retinde, iaǵni iadrolyq emes memleketter tarapynan qabyldanǵan májbúrli shara retinde qarastyrylýda. Sońǵy eki onjyldyqta iadrolyq qarýsyzdaný salasynda aitarlyqtai progrestiń joqtyǵy baiqalyp otyr. Iadrolyq synaqtardyń toqtatylýyna qaramastan, qarý-jaraqtyń jańa túrlerin shyǵarý jáne olardy jetkizý quraldaryn jetildirý máselesi áli ózekti. Bul óz kezeginde Iadrolyq qarýdy taratpaý týraly sharttyń 6-shy babyna qaishy keledi», - dedi ministrdiń orynbasary.
«Semei synaq poligonyn jabý týraly Elbasynyń tarihi sheshimi Qazaqstan halqynyń keń qoldaýyna ie. Shartty ratifikatsiialaý Qazaqstannyń iadrolyq qarýsyzdaný salasyndaǵy bastamalarymen tolyqtai sáikes keledi. Osy zań jobasyn qabyldaý respýblikalyq jáne jergilikti biýdjetterden qosymsha qarajat bólýdi talap etpeidi», - dedi Erjan Ashyqbaev.
