QR Parlamenti Májilisi Aizada Qurmanovanyń, Nurlan Dýlatbekov jáne Nurlan Ábdirovtyń ókilettigin merziminen buryn toqtatty, dep habarlaidy "Ult aqparat".
Altynshy sessiianyń alǵashqy jalpy otyrysynda Májilis tóraǵasy Nurlan Nyǵmatýlin eks-depýtattarǵa Alǵys hat tabystady.
«Qurmetti Aizada Amangeldiqyzy! Sizge barlyq áriptester atynan alǵys aitamyz. Biz birneshe jyl birge jumys istep, kóptegen zańdar qabyldadyq. Qazirgi ýaqytta siz Pavlodar oblysy ákiminiń orynbasary retinde jumysty bastap kettińiz. Sondyqtan osy jańa jumysyńyzǵa zor tabys pen sáttilik tileimiz», - dedi Májilis tóraǵasy.
Aita keteiik, Pavlodar oblysy ákiminiń orynbasary qyzmetine taǵaiyndalǵan Aizada Qurmanova áleýmettik bloktyń jumysyn qadaǵalaityn bolady.
Zań ǵylymdarynyń doktory, professor Nurlan Dýlatbekov E. A. Bóketov atyndaǵy Qaraǵandy ýniversitetine rektor bolyp taǵaiyndaldy.
Al Nurlan Ábdirov QR Parlamenti Senaty tóraǵasynyń orynbasary bolyp sailandy.
