Ortalyq sailaý komissiiasynyń hatshysy Sábila Mustafina Májilis pen máslihattar sailaýyn biriktirip ótkizýge qansha qarjy bólinetinin aitty. Onyń sózine qaraǵanda, QR Parlamenti Májilisi men máslihat depýtattarynyń birikken sailaý naýqanyna shyǵystardyń boljamdy smetasy 15,3 mlrd teńgeni quraidy. Al eger eki sailaýdy biriktirmei bólek ótkizse, shyǵystar smetasy 25 mlrd. teńgeni bolatyn edi, dep habarlaidy "Ult aqparat".
Onyń sózine qaraǵanda, eki naýqan da turaqty jáne konstitýtsiialyq merzimderge sáikes keledi. OSK olardyń josparly sipatyn eskere otyryp, 2020 jylǵy respýblikalyq biýdjetti naqtylaý aiasynda sailaýdy ótkizýge arnalǵan shyǵystardyń boljamdy smetasyn ázirlep, Úkimetke usyndy.
«2020 jylǵa arnalǵan shyǵystardyń boljamdy smetasy 10,8 mlrd teńgeni qurady. Bul shyǵystardyń negizgi úlesi 10 061 sailaý komissiiasynyń 70681 múshesiniń eńbekaqysyna tiesili, iaǵni bul soma 7,3 mlrd teńge nemese 68 paiyzy. Qalǵan 3,5 mlrd teńge nemese 32 paiyzy sailaý komissiialarynyń uiymdastyrý shyǵystaryna josparlanǵan. Osy oraida biýlletenderdi, poligrafiialyq jáne basqa da ónimderdi daiyndaý, sailaý protsesiniń jariialylyǵy men ashyqtyǵyn qamtamasyz etý maqsatynda sailaý naýqanyn aqparattyq súiemeldeý, sailaý komissiialary úshin qajetti materialdyq-tehnikalyq jaǵdailar jasaý eskerilgen», - dedi S. Mustafina.
Onyń aitýynsha, pandemiia jaǵdaiynda barlyq karantindik sharalardy saqtai otyryp, naýqan júrgiziledi. Sondyqtan sailaý komissiialarynyń múshelerin jeke qorǵanysh quraldarymen qamtamasyz etýge 341,4 mln teńge somasynda shyǵyndar kózdelgen.
«2016 jylǵy Parlament Májilisiniń ótken sailaý naýqandarymen jáne 2019 jylǵy prezidenttik sailaýmen salystyrǵanda aldaǵy naýqanǵa arnalǵan shyǵystar ósti. Birinshi kezekte, shyǵystar kóleminiń artýy sailaý komissiialary músheleriniń eńbegine aqy tóleý jónindegi shyǵystardyń ulǵaiýyna áser etken jalaqynyń eń tómengi mólsheriniń artýymen bailanysty. Ekinshiden, halyqtyń tabiǵi ósýine bailanysty jańadan qurylǵan 86 sailaý ýchaskesine, jańa ýchaskelik sailaý komissiialarynyń quramynda 600-den astam múshege jumsalatyn shyǵyndar ulǵaidy. Úshinshiden, taýarlar, jumystar men qyzmetter baǵasynyń infliatsiiasy, sondai-aq pandemiia jaǵdaiynda sailaý ótkizýge bailanysty mindetti shyǵystar ósýdiń obektivti faktorlary bolyp otyr», - dedi ol.
Sonymen qatar S. Mustafina naýqan eki biýdjettik jyl aiasynda ótetinin atap ótti.
2021 jylǵa arnalǵan shyǵystar «2021-2023 jyldarǵa arnalǵan respýblikalyq biýdjet týraly» zań jobasynda 4,5 mlrd teńge somasynda kózdelgen jáne bul somanyń barlyǵy derlik sailaý komissiialary músheleriniń eńbegine aqy tóleýge jumsalady.
«Osylaisha, tutastai alǵanda, QR Parlamenti Májilisi men máslihattary depýtattarynyń birikken sailaý naýqanyna shyǵystardyń boljamdy smetasy 15,3 mlrd teńgeni quraidy. Bul biýdjet qarajatyn tiimdi paidalaný jónindegi utymdy sheshim bolyp sanalady. Iaǵni, sailaý naýqanyn bólek ótkizgen kezde shyǵystar smetasy 25 mlrd. teńgeni quraityn edi», - dedi OSK hatshysy.
Aita keteiik, búgin Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialady.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy. Ortalyq sailaý komissiiasy men Bas prokýratýra sailaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady», - dedi Prezident.
