Búgin Májilistiń jalpy otyrysynda «Qazaqstan Respýblikasy men Ózbekstan Respýblikasy arasyndaǵy odaqtastyq qatynastar týraly shartty ratifikatsiialaý týraly» zań jobasy qabyldandy.
Atalǵan qujatqa 2022 jylǵy 22 jeltoqsanda Tashkentte qol qoiyldy.
Sharttyń maqsaty - qazaq-ózbek qatynastaryn ózara is-qimyl men ekijaqty yntymaqtastyqtyń jańa deńgeiine kóterý, sondai-aq eki memlekettiń táýelsizdigin, egemendigin, aýmaqtyq tutastyǵyn jáne turaqty ekonomikalyq damýyn odan ári nyǵaitýǵa járdemdesý.
«Sharttyń 1-babyna sáikes Qazaqstan Respýblikasy men Ózbekstan Respýblikasy jan-jaqty yntymaqtastyq, senim, teńdik jáne ulttyq múddelerdi ózara eskerý, táýelsizdikti, egemendikti, aýmaqtyq tutastyqty jáne memlekettik shekaralardyń myzǵymastyǵyn ózara qurmetteý, sondai-aq ózara mindettemelerdi adal oryndaý negizinde uzaq merzimdi odaqtastyq qatynastardy qurady jáne damytady. Qujattyń negizinde Taraptar qandai da bir bloktarǵa nemese odaqtarǵa qatyspaý mindettemesin rastaidy jáne basqa Tarapqa baǵyttalǵan qandai da bir is-áreketterge qatysýdan tartynady», - delingen Májilistiń Halyqaralyq ister, qorǵanys jáne qaýipsizdik komitetiniń málimetinde.
Sharttyń 4-babyna sáikes Qazaqstan-Ózbekstan kópqyrly yntymaqtastyǵyn baýyrlastyq, odaqtastyq jáne strategiialyq áriptestik rýhynda odan ári nyǵaitý maqsatynda Taraptar memleket basshylary basqaratyn Joǵary memleketaralyq keńesti qurdy, ol odaqtastyq qatynastardy damytýdyń strategiialyq baǵyttaryn aiqyndaidy jáne Taraptardyń ortaq múddelerine bailanysty barynsha mańyzdy máselelerdi qaraidy.
Taraptar qujat aiasynda eki memlekettiń parlamentteri, saiasi partiialary men qoǵamdyq uiymdary arasyndaǵy bailanystardy nyǵaitýǵa, óńirlik qaqtyǵystardy beibit jolmen jáne halyqaralyq quqyqtyń jalpyǵa birdei tanylǵan normalary jáne eń aldymen egemendikti, aýmaqtyq tutastyqty jáne memleket shekaralarynyń myzǵymastyǵyn qamtamasyz etý jáne saqtaý negizinde kelissózder júrgizý jolymen retteýge, sondai-aq Birikken Ulttar Uiymynyń basty rólin nyǵaitýǵa járdemdesedi.
Shart sheńberinde Taraptar ózara ekonomikalyq kooperatsiiany tereńdetý, saýda ainalymyn, investitsiialyq qyzmetti, kásipkerlik jáne ózge de sharýashylyq qyzmetti nyǵaitý jáne ulǵaitý, ózara bailanysty kólik júiesin damytý, eki el halyqtarynyń rýhani jáne mádeni jaqyndyǵyn saqtaý, ǵylym, bilim, meditsina, sport, mádeniet, týrizm, aqparat almasý salasyndaǵy ózara bailanystardy tereńdetý úshin qolaily jaǵdailar jasaidy.
Osy qujat boiynsha Taraptar ekologiia jáne azyq-túlik qaýipsizdigin qamtamasyz etý maqsatynda energetika salasynda, sondai-aq óz aýmaǵynda ekinshi Taraptyń zańdy jáne jeke tulǵalarynyń menshik quqyǵy men múlkin qorǵaý máselesinde teń quqyqtylyq pen ózara tiimdi qatynastar negizinde yntymaqtastyqty jalǵastyrady. Sonymen qatar, Shartta Taraptar transshekaralyq sý resýrstaryn utymdy paidalaný jáne sý sharýashylyǵy qurylystaryn paidalaný, sý únemdeý tehnologiialaryn engizý jóninde sharalar qabyldaityn erejeler kózdelgen.
Sharttyń 23-babyna sáikes Taraptar arasynda týyndaityn kelispeýshilikter kelissózder men konsýltatsiialar arqyly sheshiledi.
