Búgin QR Parlamenti Májilisiniń jalpy otyrysynda «Qazaqstan Respýblikasynyń keibir zańnamalyq aktilerine qaryzdyq eńbekti retteý máseleleri boiynsha ózgerister men tolyqtyrýlar engizý týraly» QR zańynyń jobasy birinshi oqylymda maquldandy, dep habarlaidy "Ult aqparat".
QR Parlamentiniń bir top depýtaty bastamashylyq jasaǵan zań jobasy qaryzdyq eńbek salasyn quqyqtyq retteýdiń bolmaýyna bailanysty azamattardyń Qazaqstan Respýblikasy Konstitýtsiiasynyń 24-babymen kepildik berilgen quqyqtaryn buzýshylyqty joiý jáne aldyn alý maqsatynda ázirlendi.
Májilis depýtaty Qanat Mýsinniń atap ótýinshe, zań jobasynyń normalary qaryzdyq eńbek salasynda eńbek etýshi azamattardy áleýmettik qorǵaýǵa, sondai-aq jumys berýshiler tarapynan olardyń eńbek úshin syiaqy alý quqyǵy saqtalýyn, eńbek jaǵdailaryn qaýipsizdik jáne gigiena talaptaryna sáikes qamtamasyz etýge baǵyttalǵan.
Zań jobasynda QR Eńbek kodeksine eńbek qatynastary júiesindegi qaryzdyq eńbek salasynyń obektileri men sýbektilerin aiqyndaý bóliginde jańa uǵymdar engizý usynylady. Personaldy berý jónindegi qyzmetti júzege asyratyn zańdy tulǵalar, onyń ishinde jumyspen qamtýdyń jekeshe agenttikteri «jiberýshi tarap» retinde aiqyndalǵan, qaryzdyq eńbekti paidalanatyn zańdy jáne jeke tulǵalar «qabyldaýshy tarap» retinde aiqyndalǵan.
Sondai-aq «qabyldaýshy taraptyń jumyskerleri», «personaldy berý» degen jańa anyqtamalar usynylady, «eńbek mindetteri», «eńbek qyzmetine bailanysty jazataiym oqiǵa» uǵymdaryna naqtylaý sipatyndaǵy ózgerister engiziledi.
Budan basqa, Eńbek kodeksin: qabyldaýshy jáne jiberýshi taraptar jumyskeriniń quqyqtary men mindetterin; qabyldaýshy tarap jumyskerleriniń negizgi jalaqysynan tómen emes bolyp belgilenetin negizgi jalaqy mólsherin; taraptardyń quqyqtary, mindetteri men jaýapkershiligi, sondai-aq qaryzdyq jumyskerdiń eńbek qyzmeti ýaqytyndaǵy jazataiym oqiǵalar kezindegi tergep-tekserý tártibin; personaldy berý jónindegi qyzmetterdi kórsetý boiynsha qyzmetti júzege asyrý tártibin retteitin normalarmen tolyqtyrý usynylyp otyr.
Sonymen qatar, Zań jobasynda Qazaqstan Respýblikasynyń Kásipkerlik kodeksine jáne «Qyzmetker eńbek (qyzmettik) mindetterin atqarǵan kezde ony jazataiym oqiǵalardan mindetti saqtandyrý týraly», «Halyqty jumyspen qamtý týraly» Qazaqstan Respýblikasynyń Zańdaryna ózgerister men tolyqtyrýlar engizý usynylady.
