© kollaj: Qýanysh Saparbai
Májilis depýtaty Amanjan Jamalov Álihan Smaiylovqa, Ulttyq bank tóraǵasy Ǵalymjan Pirmatovqa jáne Joǵarǵy esep palatasynyń tóraǵasy Natalia Godýnovaǵa Biryńǵai jinaqtaýshy zeinetaqy qory jumysy týraly depýtattyq saýal joldady, - dep habarlaidy Tengrinews.kz agenttigi.
Depýtattyń aitýynsha, Ulttyq bank BJZQ-nyń 14 trillion teńgeden asatyn aktivterin basqarady.
"Zeinetaqy aktivterin basqarý nátijeleri aianyshty. BJZQ 2014 jyldan beri zeinetaqy aktivteriniń jiyntyq kiristiligi 115,2 paiyz infliatsiiamen 119,5 paiyzdy quraǵanyn aitty. Jáne bul jetistik retinde usynyldy.
Bul argýmentterdiń qisynsyzdyǵyn túsiný úshin 2014 jyldan beri dollardyń teńgege shaqqandaǵy baǵamy úsh ese óskenin eske salaiyn! Qarapaiym tilmen aitqanda, jai ǵana shetel valiýtasyna investitsiialaý arqyly BJZQ-da eki ese kóp paida tabýǵa bolatyn edi", - dedi Jamalov.
Depýtat sońǵy 12 aida BJZQ rentabeldiligi alty paiyzdan aspaǵanyn, al azyq-túlik infliatsiiasy 24 paiyzdan asqanyn atap ótti.
"BJZQ bizdiń máselelerimizdi sheshedi dep kútýdiń qajeti joq. Sebebi, BJZQ bizdiń basty máselemiz siiaqty.
Memleket basshysy halyqtyń boryshtyq júktemesi máselesine nazar aýdarǵan bolatyn. Qarjylyq retteý agenttiginiń málimeti boiynsha, 1,5 millionǵa jýyq qazaqstandyq óz nesielerin tólei almai júr eken. Sonymen birge zeinetaqy jinaqtary qunsyzdanyp barady", - dep qosty depýtat.
Jamalov qazaqstandyqtarǵa óz jinaqtaryn áleýmettik shara retinde paidalaný quqyǵyn berýdi usyndy:
- kez kelgen nesieni óteýge;
- emdelý aqysyn tóleýge;
- kommýnaldyq tólemderdi tóleýge;
- balalardy oqytýǵa jáne basqa da ómirlik mańyzdy qajettilikterge zeinetaqy jinaqtarynyń 30 paiyzyn, biraq bir million teńgeden aspaityn mólsherde.
