Búgin QR Ortalyq sailaý komissiiasy 7-shi shaqyrylǵan QR Parlamenti Májilisiniń depýtattaryn tirkedi, dep habarlaidy "Ult aqparat".
«Zańnamaǵa sáikes Parlament depýtatynyń ókilettigi ony Ortalyq sailaý komissiiasy Parlament deptýtaty retinde tirkegen sátten bastalady. Sailanǵan depýtattardy tirkeý úshin zańnamamen kózdelgen barlyq negiz bar. Osyǵan orai kún tártibine 7-shi shaqyrylǵan QR Parlamenti Májilisiniń depýtattaryn tirkeý týraly másele shyǵaryldy», - dedi otyrysty ashqan QR OSK tóraǵasy Berik Imashev.
Osydan keiin QR OSK múshesi Anastasiia Shegortsova «Sailaý týraly» Konstitýtsiialyq zańnyń 97-1-babynyń 5-tarmaǵyna sáikes, depýtattyq mandattardy bólý kezektiligi saiasi partiianyń basshy organy sailaý qorytyndysy jariialanǵan kúnnen bastap 10 kúnnen keshiktirmei aiqyndaitynyn aitty.
«Aq jol», «Nur Otan» jáne Qazaqstannyń halyq partiiasy saiasi partiialarynyń tiisti qujattary osy jyldyń 12 jáne 13 qańtarynda QR OSK-ge usynyldy. Sonymen qatar sailaý zańnamasy negizinde Nur-Sultan qalasynyń aýmaqtyq komissiiasy OSK-ge Qazaqstan halqy Assambleiasy sailaityn Májilis depýtattaryn sailaý boiynsha daýystardy sanaý hattamasyn usyndy. Konstitýtsiialyq zańnyń 98-babyna sáikes, OSK sailanǵan Májilis depýtattaryn tirkeidi. Sailaý týraly zańnyń 45-babynda OSK sailanǵan Parlament depýtattaryn 7 kún merzim ishinde olardan Konstitýtsiiaǵa jáne respýblika zańdaryna sáikes, Parlament depýtattarynyń mártebesimen sai kelmeitin óz mindetterin doǵarý týraly jazbasha ótinishterin alǵannan keiin tirkeidi dep belgilengen. Atalǵan ótinishter alyndy. Sailaý zańnamasynda OSK árbir depýtatqa ózi belgilegen úlgidegi kýálik pen omyraýǵa taǵatyn belgini tapsyratyny kóózdelgen», - dedi ol.
Budan soń QR Ortalyq sailaý komissiiasynyń músheleri qaýly jobasyna biraýyzdan daýys berip, QR OSK tóraǵasy Berik Imashev jańa sailanǵan Májilis depýtattaryna kýálik pen omyraýǵa taǵatyn belgini tapsyrdy.
Aita keteiik, 7-shi shaqyrylǵan QR Parlamenti Májilisine elimizdegi 3 saiasi partiia jáne Qazaqstan halqy Assambleiasynyń kandidattary depýtat boldy. Atap aitqanda, «Nur Otan» partiiasy 76, «Aq jol» Qazaqstannyń demokratiialyq partiiasy 12, Qazaqstannyń halyq partiiasy 10 mandat ielendi. Sonymen qatar Qazaqstan halqy Assambleiasy atynan 9 depýtat sailandy.
Búgin Prezident Qasym-Jomart Toqaev 15 qańtar kúni jetinshi shaqyrylǵan Parlamenttiń birinshi sessiiasyn ótkizý týraly Jarlyqqa qol qoidy.
