Májilistiń bir top depýtaty qaterli isikke shaldyqqan adamdarǵa zeinetaqy jinaǵyn bir rettik tólemmen berý máselesin kóterdi, dep habarlaidy Sputnik Qazaqstan tilshisi.
Májilis depýtattary premer-ministrdiń orynbasary Gúlshara Ábdiqalyqovaǵa joldaǵan saýalynda obyrǵa shaldyqqan adamdardyń zeinetaqy jinaǵyn alý tártibi máselesin qozǵady.
Májilismen Ersultan Bekturǵanovtyń aitýynsha, qoldanystaǵy zańnamaǵa sáikes, onkologiialyq aýrýǵa shaldyqqan adamǵa múgedektik beriledi, ol ekige bólinedi: birinshisi – belgili bir múgedektik merzimi bar top, ekinshisi – merzimsiz top bolyp sanalady.
"Eńbek jáne halyqty áleýmettik qorǵaý ministrligi usynǵan derekter boiynsha, qazir onkologiialyq aýrýlar saldarynan múgedek bolǵan adamdardyń jalpy sany 39 100 adamdy quraidy, onyń ishinde 15 200 adamnyń múgedektigi merzimsiz bolyp belgilengen", - dedi depýtat.
Ol úkimet bekitken qaýlyǵa sáikes merzimsiz I nemese II toptaǵy múgedektigi bar adamdar Biryńǵai jinaqtaýshy zeinetaqy qorynan óz zeinetaqy jinaǵyn bir rettik tólem túrinde alýǵa quqyǵy bar ekenin atap ótti. Alaida, tólemdi alýdyń keibir talaptary qordaǵy aqshany alýdy birshama qiyndatatyn kórinedi.
"Máselen, zeinetaqy jinaǵy eń tómen zeinetaqynyń 12 eselengen mólsherinen aspaǵan jaǵdaida ǵana, ol bir rettik tólem túrinde beriledi. Biyl bul soma 433 296 teńgege teń. Demek, eger jinaq mólsheri osy kórsetilgen somadan asyp tússe, adam bir rettik tólemdi ala almaidy", - dedi Bekturǵanov.
Bul jaǵdaida, onyń aitýynsha, adam óziniń zeinetaqysyn belgilengen esepteý ádistemesine sáikes ai saiyn alyp otyrady. Al ai saiynǵy tólem óte mardymsyz, sondyqtan emdeý shyǵyndaryn óteýge jetpeidi.
"Qoldanystaǵy tártipke sáikes, adam qaitys bolǵannan keiin ǵana onyń zeinetaqy jinaǵyn otbasy nemese jaqyndary ala alady. Bul qarajattyń aýyryp, ómirden ótken adamǵa qajeti joq ekendigi aitpasa da túsinikti. Búginde Qazaqstanda obyr aýrýlaryn emdeý tegin júrgiziletini belgili. Biraq, bárimiz biletindei, kóp jaǵdaida syrqat adamdar bilikti otandyq nemese sheteldik klinikalarǵa qosymsha em alý úshin baryp jatady, al ol qomaqty aqshany talap etedi", - deidi májilismen.
Osyǵan bailanysty depýtat úkimetke onkologiialyq aýrýlarmen aýyratyn adamdarǵa, múgedektiginiń sanatyna qaramastan, zeinetaqy jinaǵyn bir rettik tólem túrinde berý máselesin qaita qaraýdy usyndy.
