Búgin Májiliste depýtat Snejanna Imasheva bastaǵan jumys toby «Qazaqstan Respýblikasyndaǵy sailaý týraly» Konstitýtsiialyq zańǵa jáne «Saiasi partiialar týraly» zańǵa engiziletin túzetýlerdi talqylady, dep habarlaidy "Ult aqparat" tómengi palatanyń baspasóz qyzmetine silteme jasap.
Otyrys beinekonferentsiia formatynda Májilis depýtattary, Ulttyq qoǵamdyq senim keńesiniń músheleri, memlekettik organdar men azamattyq sektor, sondai-aq «Aýyl» jáne JSDP parlamenttik emes saiasi partiialar ókilderiniń qatysýymen ótti.
Zań jobalarymen jumys barysynda depýtattar saiasi partiiadan depýtattyqqa kandidattardy usyný, sondai-aq Májilis pen máslihattar depýtattyǵyna kandidattardyń partiialyq tizimderin tirkeýge qatysty birqatar baptardy naqtylady. Osy oraida zań jobalarynyń negizi bolyp sanalatyn partiialyq sailaý tizimderinde áielder men jastar úshin keminde 30 paiyz kvotany engizý máselesine basa naza aýdaryldy.
Talqylaý barysynda «Qazaqstannyń áielderi kúshteriniń aliansy» tóraiymy Raýshan Sarsembaeva, Eýraziialyq tehnologiialyq ýniversitetiniń Adam quqyqtary, inkliýziia jáne azamattyq qoǵamdy zertteý ortalyǵynyń direktory Halida Ájiǵulova, Eýropalyq quqyq jáne adam quqyqtary saraptamalyq institýtynyń direktory Marat Bashimov jáne «Alternativa» ózekti zertteýler ortalyǵynyń basshysy Andrei Chebotarev óz oilarymen bólisti. Sonymen qatar, «Aýyl» partiiasy tóraǵasynyń birinshi orynbasary Tóleýtai Raqymbekov, Jalpyulttyq sotsial-demokratiialyq partiiasynyń tóraǵasy Ashat Raqymjanov jáne basqa da qatysýshylar pikirlerin bildirdi.
Zań jobasy boiynsha jumys odan ári jalǵasýda.
