Parlament Májilisiniń jalpy otyrysynda «QR Úkimeti men RF Úkimeti arasyndaǵy poliar mańyndaǵy orbitalarǵa soltústik baǵytta ǵarysh apparattaryn ushyrý úshin «Baiqońyr» ǵarysh ailaǵynan «Soiýz-2» tipindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
Kelisimge 2019 jylǵy 20 maýsymda Nur-Sultan qalasynda qol qoiyldy.
«Osy kelisim búkil álemdi keń jolaqty internetpen qamtamasyz etýge baǵyttalǵan OneWeb halyqaralyq jobasyn júzege asyrý úshin «Baiqońyr» ailaǵynan ǵarysh apparattaryn ushyrý kezinde Qostanai oblysynyń aýmaǵynda «Soiýz-2» tipindegi tasymaldaǵysh zymyrandardyń bólinetin bólikteriniń qulaý aýdanyn Resei tarapymen paidalaný tártibin retteidi. Qulaý aýdany jylyna nebári birneshe ret servitýt shartymen qoldanylyp otyratyn bolady. 3-6 táýlikti quraityn bul kezeńde adamdar men úi malynyń qaýipsizdigin qamtamasyz etý maqsatynda qulaý aýdanyna kirý jabyq bolady. Qalǵan ýaqytta qulaý aýdanynda júrýge jáne ony jaiylym retinde paidalanýǵa shekteý qoiylmaidy. Adamdardyń qulaý aýdanynan tysqary jerlerde turýy qaýipsiz bolyp sanalady», - dedi QR Tsifrlyq damý, innovatsiialar jəne aeroǵarysh ónerkəsibi ministri Baǵdat Mýsin.
Onyń aitýynsha, kelisimdi ratifikatsiialaý «Baiqońyr» kesheni boiynsha qazaqstandyq-reseilik yntymaqtastyqty keńeitýge, «Baiqońyr» kesheniniń barlyq turmys-tirshiligine oń áserin tigizip, ǵarysh ailaǵy júktemesin ulǵaitýǵa múmkindik beredi. «Soiýz-2» tasymaldaǵysh-zymyrany ekologiialyq qaýipsiz kerosin-ottegi otynymen ushyrylady.
«Kelisim sharttaryna sáikes tasymaldaǵysh-zymyrandardyń bólinetin bólikterin qabyldaý aýdandaryndaǵy ekologiialyq jaǵdaiǵa monitoring júrgizýge qazaqstandyq mamandar men uiymdar qatysady jáne baqylaidy», - dedi ministr.
Onyń sózine qaraǵanda, Resei tarapymen osy kelisimniń kúshine enýi týraly ishki memlekettik rásimderi oryndaldy.
