Búgin Májilistiń jalpy otyrysynda «Eýraziialyq patent konventsiiasyna Ónerkásiptik úlgilerdi qorǵaý týraly hattamasyn ratifikatsiialaý týraly» zań jobasy maquldnady, dep habarlaidy QazAqparat.
«Sizderdiń nazarlaryńyzǵa «1994 jylǵy 9 qyrkúiektegi Eýraziialyq patent konventsiiasyna Ónerkásiptik úlgilerdi qorǵaý týraly hattamasyn ratifikatsiialaý týraly» Zań jobasyn qarastyrýǵa usynyp otyrmyz. Hattamada ónerkásiptik úlgilerge eýraziialyq patentterdiń quqyqtyq qorǵaý erekshelikteri, áreket etý qaǵidattary, ótinish berýshilerdiń, quqyq ielenýshilerdiń quqyqtary men mindetteri, sondai-aq Eýraziialyq patent vedomstvosy júzege asyratyn mindettemeler men ýákilettikter kózdelgen. Atalǵan zań jobasy óńirlik patent júiesin jetildirý maqsatynda engizilip otyr», - dedi ministr.
Onyń atap ótýinshe, halyqaralyq patentteý kezinde ár memlekette jeke ótinim berý jáne jeke tólemderdi tóleý aitarlyqtai ákimshilik kedergi bolyp tabylady.
»Qazaqstandyq ótinim berýshiler úshin óńirlik júieniń artyqshylyǵy – obektini segiz memlekette bir ýaqytta qorǵaý úshin Eýraziialyq patent vedomstvosyna júginý múmkindigi. Bul júie eýraziialyq aýmaqta saýda jasaý barysynda ónerkásiptik úlgilerdi qorǵaýdyń deńgeiin arttyrýǵa jáne osy júieniń múshe memleketteriniń investitsiialyq tartymdylyǵyn arttyrýǵa múmkindik beredi. Óńirlik patent Eýraziialyq naryqqa baǵyttalǵan otandyq taýar óńdirýshileriniń múmkindikterin arttyrady», - dedi Marat Beketaev.
Hattamany ratifikatsiialaý nátijesinde otandyq taýar óndirýshilerdiń ónerkásiptik úlgisine alǵan patenti Eýraziialyq patentteý júiesine qatysýshy
8 memlekette naqty aitqanda Armeniia, Ázerbaijan, Belarýs, Qyrǵyz Respýblikasy, Qazaqstan Respýblikasy, Resei Federatsiiasy, Túrikmenstan jáne Tájikstan Respýblikasynda qoldanyla alady.
