Búgin Parlament Májilisiniń jalpy otyrysynda «2021 – 2023 jyldarǵa arnalǵan respýblikalyq biýdjet týraly» zań jobasy maquldandy, dep habarlaidy "Ult aqparat".
«Biylǵy biýdjet jobasyn qalyptastyrý álemdegi ekonomikalyq ahýaldyń nasharlaýy men qolaisyz sanitariialyq-epidemiologiialyq ahýal jaǵdaiynda júzege asyryldy. Makroekonomikalyq kórsetkishterdi eskere otyryp, 2021 jylǵa arnalǵan respýblikalyq biýdjet túsimderi 11,4 trln teńge deńgeiinde boljanyp otyr. Biýdjet tapshylyǵy 2021 jyly jalpy ishki ónimniń 3,4 paiyzynan 2023 jyly kezeń-kezeńmen 2,1 paiyzyna deiin tómendeýimen josparlanǵan», - dedi Qarjy ministri Erulan Jamaýbaev.
Onyń sózine qaraǵanda, shyǵystar 2021 jyly 14 trln teńgeni quraidy. Biýdjet jobasyn qalyptastyrý kezindegi basty qaǵidat orta merzimdi kezeńge aiqyndalǵan baǵyttar men mindetterdi, sondai-aq qabyldanǵan barlyq áleýmettik mindettemelerdi júieli túrde iske asyrý boldy.
«Osylaisha, úsh jyldyq kezeńde áleýmettik salanyń shyǵystary 23,4 trln teńgeni, onyń ishinde 2021 jyly aǵymdaǵy jylmen salystyrǵanda 394 mlrd teńgege ulǵaiyp, 7,1 trln teńgeni quraityn bolady. Shyǵyndardyń jalpy kólemindegi áleýmettik salanyń úlesi kelesi jyly 50,4 paiyz bolady», - dedi ministr.
Ekonomikanyń naqty sektoryn qoldaýǵa jáne damytýǵa arnalǵan shyǵystar orta merzimdi kezeńde 3,2 trln teńgeni quraidy, onyń ishinde 2021 jyly 1,7 trln teńge bolady. Bul rette «Nurly jol», «Nurly jer», agroónerkásiptik keshendi damytý jáne basqa memlekettik baǵdarlamalardyń is-sharalaryn qarjymen qamtamasyz etý biýdjettiń basym baǵyty bolyp qalady.
Zań jobasyn Májiliste talqylaý barysynda depýtattardyń usynystary boiynsha birqatar túzetýler engizildi. Túzetýlerdiń birinshi toby Memleket basshysynyń Joldaýyn, sondai-aq onyń jekelegen tapsyrmalaryn qarjylyq qamtamasyz etýge baǵyttalǵan:
1) áskeri qyzmetshilerge azyq-túlik úlesteriniń qunyn ulǵaitý;
2) aýyldyq eldi mekenderde feldsherlik-akýsherlik pýnktter salý;
3) Jumyspen qamtý jol kartasy aiasynda jekelegen jobalardy iske asyrýdy jalǵastyrý.
«Ekinshi top halyqtyń ómir súrý sapasyn arttyrýǵa jáne óńirlerdi damytýǵa baǵyttalǵan. Sondai-aq, «Nur Otan» fraktsiiasynyń otyrysynda aýyldyq eldi mekenderdi taza aýyz sýmen qamtamasyz etýge jáne gaz tasymaldaý infraqurylymyn damytýǵa arnalǵan shyǵystardy ulǵaitý týraly sheshim qabyldandy. Osy baǵyttardy qarjylandyrý kózi saraptamalyq zertteýler júrgizý, jańa granttardy qarjylandyrý jáne kvazisektor sýbektilerine jiberiletin shyǵystardy ońtailandyrý esebinen boldy. Túzetýler kezinde Esep komitetiniń usynymdary eskerildi», - dedi E. Jamaýbaev.
2021 jyly óńirlerge respýblikalyq biýdjet qarajaty esebinen shamamen 4 trln teńge bólinetin bolady. Bul jalpy biýdjet shyǵystarynyń 28 paiyzynan astamyn quraidy.
«Túzetýlerdiń úshinshi toby Memleket basshysynyń jekelegen memlekettik organdardy qurý jáne qaita uiymdastyrý jónindegi jarlyqtaryn iske asyrýǵa baǵyttalǵan. Bul rette, shyǵystardy ulǵaitpai, úsh jańa vedomstvonyń qyzmetin qamtamasyz etýge qarajat qaita bólindi», - dedi ministr.
