Majarstannyń Debretsen qalasynda ótip jatqan bokstan Ishtvan Boshkai týrnirinde tórt qazaqstandyq finalǵa shyqty, dep habarlady Ulttyq quramanyń bas bapkeri Ǵalymbek Kenjebaev.
Aqtyq básekege erler arasynda Mahmud Sabyrhan (52 keli), Talǵat Sháiken (69 keli) Aibek Oralbai (91 keli) jáne burymdy boksshylarymyzdan Rimma Volosenko (60 keli) ótti.
52 keli salmaqta altyn medal úshin Mahmud Sabyrhan úndistandyq Laltha Prasat Polipalimen judyryq túiistirse, Talǵat Sháiken óz salmaǵynda frantsiialyq Ýahit Hambimen kezdesedi. Aibek Oralbai bolsa úndistandyq Gaýraf Chaýhanǵa qarsy aiqasady.
Al finalǵa shyqqan jalǵyz qazaqstandyq boijetken Rimma Volosenko reseilik Ekaterina Dinnikpen «altynǵa» talasady.
Boksshylardyń finaldyq básekesi búgin Majarstan ýaqyty boiynsha saǵat 17.00-de (Nur-Sultan ýaqytymen 21.00) bastalady.
