Majarstannyń syrtqy ekonomikalyq bailanystar jáne syrtqy ister ministri Peter Siiarto óz eliniń Qazaqstannan alatyn munai kólemin arttyrǵanyn málim etti, dep habarlaidy QazAqparat.
Majarstannyń syrtqy ekonomikalyq bailanystar jáne syrtqy ister ministri Peter Siiarto Qazaqstanǵa jumys sapary barysynda QR Premer-Ministriniń orynbasary – Syrtqy ister ministri Muhtar Tileýberdimen birge BAQ ókilderiniń aldyna shyǵyp, suraqtarǵa jaýap berdi.
«Bizdegi qajettiliktiń 65%-yn Resei munaiy jaýyp otyr. Bul biz osylai oilastyrǵandyqtan jasalǵan nárse emes. Majarstandy energiiamen qamtamasyz etýdiń jalǵyz fizikalyq joly osy bolyp tur. Iaǵni, munai qubyryn salý óte qymbat ári óte kóp ýaqytty qajet etedi. Osynyń bárin eskergendikten qajetti munaidyń 65 paiyzyn «Drýjba» munai qubyry arqyly alyp otyrmyz. Bul - kún saiyn 20 myń tonna munai degen sóz», - dedi Peter Siiarto.
Sondai-aq, ol munai importynda Qazaqstannyń úlesi artqanyn atap ótti.
«Keiingi kezde Qazaqstannan munai satyp alý kólemin de kóbeittik. Qazirgi tańda biz tutynatyn munaidyń 16%-y Qazaqstannan keledi. Bul kólem de Resei arqyly biriktirilgen munai qubyrymen jetedi. Bul másele túbegeili ulttyq múddemizge sai qaralyp jatqanyn atap ótkim keledi. Bul týraly Batystyń nemese Shyǵystyń ne oilaityny mańyzdy emes. Biz úshin jalǵyz másele mańyzdy, ol – Majarstandy energiiamen qamtamasyz etý. Bul iske qater tónbeýi kerek. Eshkim majar halqynyń Ýkrainadaǵy shielenis úshin qaltasynan qun tólegenin talap ete almaidy», - dedi Majarstan ókili.
