Qazaqstannyń eńbek sińirgen ártisi Maira Iliiasov Qazaqstan halqyn karantin sharalaryn saqtaýǵa shaqyrdy, dep habarlaidy QazAqparat.
«Qymbatty aǵaiyn, Qazaqstan halqy! Qazirgi kezde koronavirýstyń órshýine bailanysty karantin sharalary qatańdatylǵanymen, turǵyndarymyzdyń qaýipsizdikti saqtamaýy saldarynan adam ómirine qaýipti jaǵdailar jii kezdesip jatyr. Búginde Shyǵys Qazaqstan, Soltústik Qazaqstan oblystarynda koronavirýspen aýyrǵan adam sany kóptep anyqtalyp jatyr. Sondyqtan sizderden karantin sharalaryn saqtaýlaryńyzdy ótinip suraimyz. Maska kiip, qoldy jii jýyp turý kerek. Qoldy sabynmen 30-40 sekýnd jaqsylap jýsa da artyq etpeidi. Ózderińizben birge únemi sanitaizer alyp júrińizder. Onymen qoldy únemi tazalap otyrǵan jón. Múmkindigine adamdar kóp jinalatyn jerge barmaǵan abzal. Toi-tomalaq jasaýdy da doǵary turǵanymyz durys bolar edi», - dedi «Qurmet», «Parasat» ordenderiniń iegeri.
Sonymen qatar QR Eńbek sińirgen ártisi aǵaiyn-týysymyzǵa, balalarymyzǵa, jastarymyzǵa koronavirýs qaýpin túsindirip otyrýymyz kerektigin basa aitady.
«Biz sizdermen birgemiz. Óner adamdary ózderińizdi jaqsy kóredi. Elimiz aman, jurtymyz tynysh bolsyn! Amandyqta jolyǵaiyq, aman bolyńyzdar!», - deidi Maira Iliiasova.
