Astanadaǵy advokattar alqasynyń advokaty Jomart Sarmanov Tengrinews.kz tilshisine QR Prezidentiniń Ákimshiligi Basshysynyń burynǵy orynbasary Baǵlan Mailybaevtyń qamaýǵa alynǵanyna qatysty keibir málimetterdi habarlady.
Sóitsek, advokat Mailybaevty qorǵaýǵa kelisim jasapty. Jomart Sarmanov QR Prezidentiniń Ákimshiligi Basshysynyń eks-orynbasaryna qatysty qylmystyq istiń qupiia túrde ótetinin málimdedi.
"QR UQK baspasóz qyzmetiniń BAQ-qa taratqan resmi habarlamasynyń aiasyndaǵy keibir málimetterdi ǵana aita alamyn. Iá, shyn máninde QR Prezidentiniń Ákimshiligi Basshysynyń burynǵy orynbasary B.A.Mailybaev QR UQK Tergeý departamentiniń QR Qylmystyq kodeksiniń 185-babynyń 3-bóligi ("Memlekettik qupiialardy zańsyz jinaý, taratý, jariia etý") boiynsha tergep jatqan qylmystyq iste kúdikti", - dedi Baǵlan Mailybaevtyń advokaty Jomart Sarmanov.
Ol óz qorǵaýyndaǵy azamatqa qatysty eki aiǵa qamaýǵa alý túrindegi bultartpaý sharasynyń tańdalǵanyn eske saldy.
"Keibir jýrnalisterge jáne ózge de tulǵalarǵa, onyń ishinde Mailybaevtyń ustalǵany jáne qamalǵany týraly pikir bildirip, jasamaǵan áreketin jasady dep, basqa istermen, naqtyraq aitsaq, eks-ministr Qýandyq Bishimbaevtyń isimen belgili bir bailanys taýyp otyrǵan belgili saiasattanýshylarǵa eskertkim keledi. Bishimbaevqa qatysty isti basqa vedomstvo tergep jatyr - Sybailas jemqorlyqqa qarsy is-qimyl ulttyq biýrosy. Ol qylmystyń basqa túri boiynsha kúdikke ilingen - aldyn ala kelisim boiynsha top bolyp birneshe márte asa iri kólemde para aldy degen kúdik", - dep málimdedi Sarmanov.
Osyǵan bailanysty Mailybaevtyń advokaty bul eki istiń ózara bailanysy joq ekenin naqtylap otyr.
"Eki túrli adam jáne eki túrli qylmys quramy. Eki túrli qylmystyq is, bir-birimen bailanyspaidy. Joǵary laýazymdy tulǵalarǵa qatysty qoǵamdy dúrliktirgen basqa qylmystyq istermen bailanysy joq. Mailybaevtyń isinde respýblikalyq biýdjetten 1,3 milliard teńge jymqyrylǵany jaily bir BAQ-ta jylt etip shyqqan jańalyq týraly málimet joq", - dedi advokat.
"Baǵlan Mailybaev memlekettik qupiialarǵa bailanysty qylmystyq quqyqbuzýshylyq jasady dep kúdikke ilingen, bul týraly QR Ulttyq qaýipsizdik qyzmetiniń baspasóz qyzmeti naqty ári resmi túrde habarlady. Túrli boljam men qaýesetter, jýrnalister men saiasattanýshylardyń túrli boljamdary durys emes jáne kúdikti Baǵlan Mailybaevqa qatysty sotqa deiingi ádil tergeýge kedergi keltirýi múmkin, sóitip, qoǵamda qate pikir qalyptastyrýy múmkin", - dedi Jomart Sarmanov.
Eske salaiyq, osyǵan deiin Memleket basshysynyń Jarlyǵymen Baǵlan Mailybaev Qazaqstan Respýblikasy Prezidentiniń Ákimshiligi Basshysynyń orynbasary qyzmetinen bosatylǵany belgilip bolǵan edi. Keiin onyń qamaýǵa alynǵany jaily aqparat tarady. Bir apta ótkende Marat Tájin Prezident Ákimshiligi basshysynyń birinshi orynbasary bolyp taǵaiyndalǵan. Sol kezde osy taǵaiyndaýǵa qatysty pikir bildirgen saiasattanýshy Dosym Sátbaev Tájinniń taǵaiyndalýy Prezidenttiń jas kadrlardan kóńili qalǵanyn kórsetedi dep málimdegen edi.
