Maik Pompeo, AQSh Ortalyq barlaý basqarmasynyń jańa basshysy. Vashington, 23 qańtar 2017 jyl.
AQSh senaty 53 jastaǵy Maik Pompeony Ortalyq barlaý basqarmasynyń (TsRÝ) direktory etip bekitti, - dep habarlaidy "Ult aqparat" Azattyqqa silteme jasap.
Kongrestiń ókilder palatasyna Kanzas shtatynan sailanǵan respýblikashyl Pompeonyń kandidatýrasyn 66 senator qoldap, 32 senator qarsy daýys berdi.
Pompeo TsRÝ-dy halyqaralyq jaǵdai Resei men Qytaidyń basqynshylyq is-qimyldarynan, Soltústik Koreianyń iadrolyq qarýǵa ie bolý piǵyly men "Islam memleketi" ekstremistik uiymynyń paida bolýynan shielenisken tusta basqaraiyn dep otyr.
Amerikalyq aqparat quraldary TsRÝ-dyń jańa basshysyna taǵy bir qiyn mindet - Tramp pen barlaý qyzmeti qoǵamdastyǵy arasynda durys qarym-qatynas ornatý da júkteletinin aitady. Donald Tramp prezident bolyp sailanǵan soń-aq kún saiyn oǵan arnalǵan barlaý brifingileri bastalǵan. Biraq Tramp olarǵa barmady. Tramp sonymen qatar arnaiy qyzmettiń Resei ózine sailaý kampaniiasy kezinde kómektesti degen tujyrymyn joqqa shyǵaryp, tipti olardy óziniń prezident retindegi bedeline nuqsan keltirip qaralamaq dep aiyptaǵan.
"Men barlaý qoǵamdastyǵynyń reseilik hakerler kóbinese Tramptyń sailaý kampaniiasyna kómektespek bolǵan degen pikirin qoldaimyn" dedi Pompeo senatta ótken tyńdaýda. Ol sonymen qatar óz bastyǵy aiaq astynan terroristerden jaýap alýda olardy sýǵa batyrǵandai etip tergeý amaldaryn qaita bastaýǵa buiryq berse, oryndaýdan bas tartatynyn aitqan. AQSh-taǵy qoldanystaǵy zań boiynsha, tutqyndardy tergeýdiń mundai túrleri azaptaýǵa jatady.
