مايك پومپەو, اقش ورتالىق بارلاۋ باسقارماسىنىڭ جاڭا باسشىسى. ۆاشينگتون, 23 قاڭتار 2017 جىل.
اقش سەناتى 53 جاستاعى مايك پومپەونى ورتالىق بارلاۋ باسقارماسىنىڭ (تسرۋ) ديرەكتورى ەتٸپ بەكٸتتٸ, - دەپ حابارلايدى "ۇلت اقپارات" ازاتتىققا سٸلتەمە جاساپ.
كونگرەستٸڭ ٶكٸلدەر پالاتاسىنا كانزاس شتاتىنان سايلانعان رەسپۋبليكاشىل پومپەونىڭ كانديداتۋراسىن 66 سەناتور قولداپ, 32 سەناتور قارسى داۋىس بەردٸ.
پومپەو تسرۋ-دى حالىقارالىق جاعداي رەسەي مەن قىتايدىڭ باسقىنشىلىق ٸس-قيمىلدارىنان, سولتٷستٸك كورەيانىڭ يادرولىق قارۋعا يە بولۋ پيعىلى مەن "يسلام مەملەكەتٸ" ەكسترەميستٸك ۇيىمىنىڭ پايدا بولۋىنان شيەلەنٸسكەن تۇستا باسقارايىن دەپ وتىر.
امەريكالىق اقپارات قۇرالدارى تسرۋ-دىڭ جاڭا باسشىسىنا تاعى بٸر قيىن مٸندەت - ترامپ پەن بارلاۋ قىزمەتٸ قوعامداستىعى اراسىندا دۇرىس قارىم-قاتىناس ورناتۋ دا جٷكتەلەتٸنٸن ايتادى. دونالد ترامپ پرەزيدەنت بولىپ سايلانعان سوڭ-اق كٷن سايىن وعان ارنالعان بارلاۋ بريفينگٸلەرٸ باستالعان. بٸراق ترامپ ولارعا بارمادى. ترامپ سونىمەن قاتار ارنايى قىزمەتتٸڭ رەسەي ٶزٸنە سايلاۋ كامپانيياسى كەزٸندە كٶمەكتەستٸ دەگەن تۇجىرىمىن جوققا شىعارىپ, تٸپتٸ ولاردى ٶزٸنٸڭ پرەزيدەنت رەتٸندەگٸ بەدەلٸنە نۇقسان كەلتٸرٸپ قارالاماق دەپ ايىپتاعان.
"مەن بارلاۋ قوعامداستىعىنىڭ رەسەيلٸك حاكەرلەر كٶبٸنەسە ترامپتىڭ سايلاۋ كامپانيياسىنا كٶمەكتەسپەك بولعان دەگەن پٸكٸرٸن قولدايمىن" دەدٸ پومپەو سەناتتا ٶتكەن تىڭداۋدا. ول سونىمەن قاتار ٶز باستىعى اياق استىنان تەرروريستەردەن جاۋاپ الۋدا ولاردى سۋعا باتىرعانداي ەتٸپ تەرگەۋ امالدارىن قايتا باستاۋعا بۇيرىق بەرسە, ورىنداۋدان باس تارتاتىنىن ايتقان. اقش-تاعى قولدانىستاعى زاڭ بويىنشا, تۇتقىنداردى تەرگەۋدٸڭ مۇنداي تٷرلەرٸ ازاپتاۋعا جاتادى.
