2026 jylǵy maýsymda Enbek.kz Elektrondyq eńbek birjasynda eńbek naryǵy qaita jandanyp, jumys berýshiler 108,7 myń bos jumys ornyn jariialady. Bul mamyr aiymen salystyrǵanda 25,4%-ǵa kóp. Sonymen qatar jumys izdeýshiler 126,7 myń túiindeme ornalastyryp, kórsetkish bir aida 38,3%-ǵa ósti, dep habarlaidy ult.kz.
Eńbek jáne halyqty áleýmettik qorǵaý ministrliginiń málimetinshe, eńbek naryǵyndaǵy belsendiliktiń artýyna mamyr aiyndaǵy maýsymdyq báseńdeýdiń aiaqtalýy jáne oqý oryndarynyń túlekteriniń jumys izdei bastaýy áser etken.
Eń kóp kadr qajet bolǵan salalar:
- bilim berý – 19,2 myń bos jumys orny;
- qyzmet kórsetý salasy – 16,5 myń;
- aýyl, orman jáne balyq sharýashylyǵy – 12,1 myń;
- densaýlyq saqtaý jáne áleýmettik qyzmet kórsetý – 9,5 myń;
- qurylys – 8,4 myń;
- óńdeý ónerkásibi – 7,3 myń.
Óńirler boiynsha eń kóp bos jumys orny Túrkistan oblysynda (12,3 myń), Astana qalasynda (8,5 myń), Jambyl oblysynda (7 myń) jáne Qaraǵandy oblysynda (6,7 myń) tirkeldi.
Jumys izdeýshilerdiń jartysyna jýyǵy – 35 jasqa deiingi jastar. Olar jariialanǵan túiindemelerdiń 49%-yn qurady. Sarapshylar muny biylǵy túlekterdiń eńbek naryǵyna belsendi shyǵýymen bailanystyrady.
Maýsym aiynda eń joǵary jalaqy usynylǵan bos jumys oryndary qatarynda:
- divizion direktory – shamamen 1,98 mln teńge;
- basqarma bastyǵynyń orynbasary – 1,38 mln teńge;
- uńǵyma injeneri – 1,31 mln teńge.
Al eń joǵary jalaqy kútimi ushqyshtarda (3,4 mln teńge), júielik sáýletshilerde (2,5 mln teńge) jáne dáriger-hirýrgterde (2 mln teńge) tirkelgen.
Jyl basynan beri Enbek.kz platformasynda jalpy 604,4 myń bos jumys orny jariialanyp, 736 myń túiindeme ornalastyrylǵan.
