Maýsym aiynyń qorytyndysynda azyq-túliktiń álemdik baǵasy shamamen 34 paiyzǵa ósti. Bul týraly Úkimettiń keńeitilgen otyrysynda QR Premer-Ministri Asqar Mamin aitty, dep habarlaidy QazAqparat.
«Biylǵy birinshi jartyjyldyqta Úkimet ekonomikany qalpyna keltirý jáne ony ornyqty ósý serpinine shyǵarý, halyq pen bizneske qajetti qoldaý kórsetý jumystaryn jalǵastyrdy. Qazirgi jańa bolmysta ekonomikany yntalandyrýdyń barlyq quraldaryn keshendi túrde paidalaný ekonomikalyq belsendilikti qoldaýǵa múmkindik berdi. Halyqaralyq uiymdar biyl álemdik ekonomikanyń qalpyna kelý qarqyny joǵary bolady dep josparlap otyr. Osy turǵyda taýar naryqtaryndaǵy baǵalar ósýde», - dedi Asqar Mamin.
Onyń dereginshe, jyl basynan beri munai 44 paiyzǵa qymbattap, 1 barreli 73 dollarǵa deiin jetti. Metall baǵasy da ósti.
«Jahandyq jáne óńirlik óndiris pen saýda bailanystyń buzylýyna klimattyq jaǵdailardyń ózgerýine bailanysty sońǵy 10 jylda azyq-túliktiń álemdik baǵasy neǵurlym joǵary qarqynmen ósýde. Maýsym aiynyń qortyndysy boiynsha azyq-túliktiń álemdik baǵasy shamamen 34 paiyzǵa ósti. Álemdik infliatsiianyń ósýi, qarjy naryqtarynda turaqsyzdyq, sondai-aq virýstyń jańa mýtatsiialarynyń paida bolýy jaǵdaiynda jahandyq ekonomikada belgisizdik faktorlary joǵary deńgeide qalyp otyr», - dedi Úkimet basshysy.
