Maýsym aiynan bastap 18 ýchaske aqyly júiege aýysady. Bul týraly «QazAvtoJol» kompaniiasy habarlady.
Infraqurylymdy damytýdyń «Nurly jol 2020-2025» memlekettik baǵdarlamasynyń aiasynda elimizde 11 myń shaqyrym avtojol aqyly júiege aýysady. Onyń ishinde jalpy uzyndyǵy 5,8 myń shaqyrymdy quraityn 18 ýchaske aǵymdaǵy jyldyń maýsym aiynan bastap paidalanýǵa beriledi. Bul: Shymkent-Ózbekstan shekarasy, Oral-Resei Federatsiiasynyń shekarasy (Saratov), Oral-Resei shekarasy (Samara), Resei shekarasy (Orynbor)-Aqtóbe, Shýchinsk-Petropavl, Shymkent-Qyzylorda, Shymkent-Taraz, Taraz-Qainar, Qapshaǵai-Taldyqorǵan, Qarabutaq-Qyzylorda, Aqtóbe-Oral, Atyraý- Beineý- Ózbekstan shekarasy, Aqtaý-Beineý, Qostanai-Resei shekarasy (Troitsk), Nur-Sultan-Qostanai, Pavlodar- Resei shekarasy (Omby), Nur-Sultan-Pavlodar, Pavlodar-Semei-Qalbataý ýchaskeleri.
Ár ýchaske boiynsha qandai avtokólikterden tólemaqy alynatyny tas joldyń tehnikalyq sanatyna tikelei bailanysty. Máselen, I-tehnikalyq sanattaǵy tas joldarda barlyq avtokólikter, al II jáne III-tehnikalyq sanattaǵy tas joldarda tek júk kólikteri tólem jasaidy. Osy sátte, alǵashqy aqyly ýchaske engizilgen kezden bastap búgingi kúnge deiin aqyly joldardyń tarifterine ózgeris engizilmegenin, baǵanyn óspegenin erekshe atap ótý qajet. Al jańa aqyly ýchaskeler boiynsha tólem mólsherlemesi QR Indýstriia jáne infraqurylymdyq damý ministrliginiń qarastyrýynda. Sondai-aq, testik paidalaný barysynda avtokólikterden ýaqytsha tólem alynbaidy.
Memlekettik baǵdarlamany júzege asyrý josparynyń negizinde, Qazaqstan Respýblikasynyń Indýstriia jáne infraqurylymdyq damý ministrligi men «QazAvtoJol» UK» AQ birlesip tólem alýdyń «ashyq júiesin» engizý týraly sheshim qabyldady.
Júieniń ereksheligi – ýchaskelerde shlagbaýmdar bolmaidy. Avtokólikterdiń júrip ótken joly týraly aqparat arkalarda ornalasqan arnaiy kameralar arqyly tirkeledi.
Tólem avtokóliktiń memlekettik tirkeý nómiri boiynsha jasalady. Sondai-aq, tólemaqy men avtokólik týraly tolyq aqparat alýǵa múmkindik beretin arnaiy belgilerdi (RFID-belgi) japsyrý da kózdelgen.
Jańa aqyly ýchaskeler júrgizýshiler men jolaýshylardyń sapary jaily bolýy men qaýipsizdigin qamtamasyz etedi. Jol-kólik apaty azaiyp, jol infraqurylymy, jol boiyndaǵy servis nysandary, táýlik boiy usynylatyn servis belsendi damityn bolady.
Aqyly júie engizilmesten buryn avtojoldar qaita jańartylatynyn eskerý qajet. Qaita jańartýǵa deiingi jáne jańa joldardaǵy jol-kólik apatynyń kórsetkishterine súienetin bolsaq, aqyly joldardy paidalanýǵa bergennen keiin jol-kólik apattarynyń sany azaiatyny dáleldengen. Mysaly, qaita jańartý jumystary júrgizilgennen keiin «Aqtóbe-Oral-Resei shekarasy» avtojolyndaǵy kólik apaty 25%-ǵa, «Nur-Sultan-Pavlodar» avtojolynda 46%-ǵa, «Qyzylorda-Shymkent-Taraz» avtojolynda 43%-ǵa, al «Pavlodar-Semei-Qalbataý» ýchaskesinde 62%-ǵa tómendegen.
Jańa aqyly ýchaskeler kólik qozǵalysyna qatysýshylardyń qaýipsizdigin qamtamasyz etý ustanymy boiynsha salynǵan. Sol sebepti, olar engizilgen sátten bastap respýblikalyq mańyzy bar avtojoldarda jol-kólik apatynyń sany azaiady dep josparlanǵan.
