Ultymyz úshin ulyq meken sanalatyn Ulytaýdyń endi búkil álem úshin de baǵasy arta túspek. Sebebi, halqymyz qaster tutatyn qasietti mekende «Jezkiik» I Halyqaralyq etno-mýzyka festivali shymyldyq túrdi. Álemniń ár túkpirinen kelgen óner ujymdarynyń ónerin tamashalaǵandardyń qatarynda «Nur Otan» partiiasy Tóraǵasynyń Birinshi orynbasary da boldy. Qaraǵandy oblysyna arnaiy saparmen barǵan Máýlen Áshimbaev festivaldiń ashylý saltanatyna qatysty.
Atalǵan is-sharada Mádeniet jáne sport ministri Arystanbek Muhamediuly Elbasynyń barsha qatysýshylarǵa arnalǵan quttyqtaý hatyn oqyp berdi.
«Qazaq eliniń rýhani ortalyqtarynyń biri sanalatyn qasietti Ulytaý jerinde, «Rýhani jańǵyrý» baǵdarlamasy aiasynda ótetin bul óner merekesi elimizdiń mádeni ómirindegi aitýly oqiǵa bolady dep senemin. Tól tarihy men ónerin qasterlegen ult qana biik maqsattarǵa qol jetkize alady. Mýzyka óneri – halyqtyń tarihyn, asqaq rýhyn, jan-dúnie sulýlyǵyn pash etetin rýhani qundylyqtardyń bir. Sondai-aq bul festival halqymyzdyń mádeni murasyn jańǵyrtyp, folklorlyq ónerimizdiń baǵa jetpes bailyǵyn álemge tanytýǵa da oń yqpalyn tigizedi dep oilaimyn», – delingen Elbasynyń quttyqtaýynda.
Sonymen qatar Memleket basshysy festivalǵa álemniń ár túkpirinen kelgen óner ujymdarynyń qatysýy onyń mártebesin odan saiyn arttyra túsetinine nazar aýdaryp, mundai is-sharalardyń ult pen ultty, el men eldi rýhani turǵyda jaqyndastyryp, mádeni yntymaqtastyqtyń aiasyn keńeite túsýge qyzmet etetinin de atap ótken.
Óz kezeginde «Nur Otan» partiiasy Tóraǵasynyń Birinshi orynbasary qatysýshylar men barsha halyqty osyndai keremet óner merekesimen quttyqtap, bul sharanyń qazaq mádenietiniń órisin keńeitetin tyń bastama ekenin aitty.
– Bul festival Elbasymyzdyń «Rýhani jańǵyrý» baǵdarlamasynyń jemisi ekeni sózsiz. Biz osyndai igi bastamalar arqyly halqymyzdyń rýhani jáne mádeni qundylyqtaryn saqtap, olardy búkil álemge dáriptep, tanymaldylyǵyn arttyramyz. Qoinaýyna tarih tunǵan, baýyrynda babalarymyzdyń izi qalǵan qasietti Ulytaý jerine arnaiy kelip, ótkennen taǵylym alyp, aýqymdy festival ótkizýdi halqymyzdyń jarqyn bolashaǵy úshin jasalǵan batyl qadam dep te qabyldaýǵa bolady. Sondyqtan osy jobanyń ómirsheń bolýyna tilektestigimizdi bildiremiz, – dedi Máýlen Áshimbaev.
Sonymen qatar Qaraǵandy oblysynyń ákimi Erlan Qoshanov barsha qonaqtar men qatysýshylarǵa festivaldiń joǵary deńgeide ótýine atsalysqandary úshin alǵysyn jetkizdi. Osy rette festivaldiń qurmetti qonaqtarynyń qatarynda qazaqtyń jeztańdai ánshisi Bibigúl Tólegenova, ultymyzdyń batyry, qazaqtan shyqqan tuńǵysh ǵaryshker, Halyq Qaharmany Toqtar Áýbákirov, belgili memleket jáne qoǵam qairatkeri Oralbai Ábdikárimov, Parlament depýtattary jáne taǵy basqa óner juldyzdary men qoǵam belsendileri bolǵanyn atap ótken jón.
Festival barysynda halyq «NICELABELLE» (Frantsiia), «Hairýllo Dadoboev» (Tájikstan), «Hoverna» (Polsha), «Skaziteli Altaia» (Resei), «Mariachi Champaña Nevin» (Meksika), «Vagakki» (Japoniia), «Túrik álemi» (Túrkiia), «Reading Pipe Band» (Shotlandiia,) «Amigos de Corazon» (Perý) jáne qazaqstandyq «Arqa sazy» (Qaraǵandy) men «Qobyz saryny» (Taldyqorǵan) folklorlyq ansamblderiniń ónerlerin tamashalady.
