Búgin «Nur Otan» partiiasy tóraǵasynyń birinshi orynbasary Máýlen Áshimbaev Japoniianyń Qazaqstandaǵy Tótenshe jáne Ókiletti Elshisi Tatsýhiko Kasaimen jáne Germaniianyń elimizdegi Tótenshe jáne Ókiletti Elshisi Tilo Klinnermen kezdesti, dep habarlaidy "Ult aqparat" partiianyń baspasóz qyzmetine silteme jasap habarlaidy.
Onda taraptar eki el arasyndaǵy yntymaqtastyqty odan ári arttyryp, partiiaaralyq dialogty damytý jaiyn keńinen talqylady.
Qazaqstan men Japoniia arasyndaǵy diplomatiialyq qarym-qatynas el táýelsizdiginiń alǵashqy jyldarynan bastap júieli júrgizilip keledi. Sonyń arqasynda eki el arasyndaǵy yntymaqtastyq nyǵaiyp, túrli sala boiynsha serpindi damý baiqalady. Osy máselelerge nazar aýdarǵan «Nur Otan» partiiasy Tóraǵasynyń Birinshi orynbasary bul memleket basshylarynyń deńgeiindegi dostyq qarym-qatynastyń nátijesi ekenin aitty.
Sonymen qatar ol eki eldiń saýda-ekonomikalyq bailanysynyń damý kórsetkishterine de toqtaldy. Onyń aitýynsha, qazirgi tańda Qazaqstan men Japoniia arasyndaǵy taýar ainalymynyń kólemi 2 mlrd. AQSh dollaryn quraidy. Sondai-aq 2005 jyldan beri atalǵan elden Qazaqstanǵa 6 mlrd. AQSh dollary kóleminde investitsiia tartylǵan. Eki eldiń saiasi jáne ekonomikalyq máselelermen birge óńirdegi qaýipsizdikti qamtamasyz etý, beibitshilikti saqtaý, jahandyq túitkilderdiń oń sheshilýine yqpal etý siiaqty ortaq múddeleriniń de bar ekenin atap ótken jón.
Óz sózinde «Nur Otan» partiiasy Tóraǵasynyń Birinshi orynbasary Qazaqstan men Japoniianyń Parlament jáne partiiaaralyq bailanystarynyń da joǵary deńgeide ekenin tilge tiek etti. Odan bólek, biyl «Nur Otan» partiiasynyń 20 jyldyǵy ekenine kóńil bólip, soǵan orai taiaýda ǵana ótken partiianyń kezekti XVIII sezi týraly aitty.
«Sezde partiiamyzben birge elimiz úshin de asa mańyzdy máselelerdi talqyladyq. Sonyń nátijesinde partiianyń 2030 jylǵa deiingi baǵdarlamasy qabyldandy. Soǵan orai el Úkimeti óz jumysynda osy baǵdarlamaǵa basymdyq beredi. Parlament Májilisindegi partiia fraktsiiasy men elimiz boiynsha partiia filialdarynyń jumysy da osy baǵdarlamany júzege asyrýǵa baǵyttalady. Baǵdarlamada bizdiń kózdegen maqsattarymyz ben baǵyt-baǵdarymyz anyq kórsetilgen. Atap aitqanda, qazaqstandyq otbasylardyń turmysyn jaqsartý, densaýlyq saqtaý men bilim berý salasyn damytý, infraqurylymdy jetildirý, inkliýzivti ekonomikany qalyptastyrý, biznesti damytý siiaqty qoǵamdaǵy ózekti áleýmettik máselelerdi oń sheshýge baǵyttalǵan naqty maqsattar bar», - degen Máýlen Áshimbaev sezde Memleket basshysy, «Nur Otan» partiiasynyń Tóraǵasy Nursultan Nazarbaevtyń birqatar naqty tapsyrmalar bergenin atap ótti.
Óz kezeginde Japoniianyń Qazaqstandaǵy Elshisi Tatsýhiko Kasai eki eldiń bailanysyn odan ári nyǵaitýǵa kúsh jumsaitynyn jetkizdi.
«Qazaqstan turaqty ekonomikasy men saiasi júiesi qalyptasqan el. «Nur Otan» partiiasynyń sezinde Qazaqstan Prezidenti «Nur Otan» partiiasynyń jańa baǵdarlamasy áleýmettik sipatqa ie ekenin atap ótti. Osy rette japon tarapy atalǵan baǵyttaǵy yntymaqtastyqty odan ári kúsheitýge múddeli ekenin jetkizgim keledi», - dedi elshi myrza.
«Nur Otan» partiiasy Tóraǵasynyń Birinshi orynbasary Máýlen Áshimbaevtyń Germaniianyń Qazaqstandaǵy Tótenshe jáne Ókiletti Elshisi Tilo Klinnermen kezdesýinde eki el bailanysynyń damý qarqyny sóz boldy.
«Germaniia Qazaqstannyń Eýropadaǵy strategiialyq áriptesteriniń biri. Eki eldiń arasynda memleket basshylary, memlekettik organdar jáne saiasi partiialar deńgeiinde dostyq áriptestik bailanys ornaǵan. Sońǵy jyldary bizdiń ekonomikalyq bailanystarymyz da qarqyndy damýda», - degen Máýlen Áshimbaev eki eldiń saýda-ekonomikalyq kórsetkishterine nazar aýdardy.
Onyń sózine qaraǵanda búginde Qazaqstan men Germaniia arasyndaǵy taýar ainalymy 2 mlrd. AQSh dollary shamasynda. Sondai-aq kezdesýde Germaniianyń 2005 jyldan beri Qazaqstanǵa 8,6 mlrd. AQSh dollary kóleminde investitsiia salǵany da aityldy.
«Sondyqtan Germaniia elimiz úshin eń iri investorlardyń biri bolyp sanalady. Aldaǵy ýaqytta osy salany odan ári damytamyz dep senemin», - dedi «Nur Otan» partiiasy Tóraǵasynyń Birinshi orynbasary.
Is-shara barysynda eki eldiń partiiaaralyq bailanysy týraly da sóz boldy. Máýlen Áshimbaev «Nur Otan» partiiasy men Germaniianyń Hristian-demokratiialyq odaǵy arasynda tyǵyz bailanys ornaǵanyn aitty. Sondai-aq ol «Nur Otan»-nyń jaqynda ótken kezekti XVIII sezinde partiianyń jańa baǵdarlamasy qabyldanǵanyn jáne onda Qazaqstan Prezidenti, partiia Tóraǵasy Nursultan Nazarbaevtyń Úkimetke áleýmettik salany damytýǵa arnalǵan naqty tapsyrmalar bergenin sóz etti.
«Sezde partiia Tóraǵasy halyqtyń áleýmettik jaǵdaiyn jaqsartyp, ál-aýqatyn arttyrýǵa baǵyttalǵan birqatar tapsyrmalar berdi. Atap aitqanda, qazaqstandyq otbasylardyń turmys deńgeiin kóterý, baspanamen qamtý, bilim berý men densaýlyq saqtaý salalaryn jaqsartý jáne osyndai basymdyqtardy búkil elimiz boiynsha júzege asyrý máseleleri qamtyldy. Sondyqtan aldaǵy ýaqytta partiia osy baǵyttarda Úkimetpen, memlekettik jáne jergilikti atqarýshy organdarmen birlesip jumys istep, Memleket basshysynyń tapsyrmalarynyń oryndalý barysyna baqylaý jrgizedi», - dedi Máýlen Áshimbaev.
Al Tilo Klinner Qazaqstan men Germaniia arasyndaǵy dostyq qarym-qatynastyń berik ornaǵanyna nazar aýdaryp, osy bailanysty odan ári damytý kerektigin aitty.
- Qazaqstan Germaniianyń Ortalyq Aziiadaǵy eń senimdi serigi. Bizdiń aýyl sharýashylyǵyn damytý baǵytynda da tájiribe almasýǵa mol múmkindigimiz bar. «Nur Otan» partiiasynyń sezinde aitylǵan basymdyqtar boiynsha da bailanys ornatýǵa daiynbyz. Aldaǵy ýaqytta sol osy sezde qabyldanǵan «Nur Otan»-nyń jańa baǵdarlamasy Qazaqstandy jańa biikke shyǵarady dep senemin, - dedi Germaniia elshisi.
