Parlament Senatynyń tóraǵasy Máýlen Áshimbaev depýtattardyń biýdjet kirisiniń shamamen úshten biriniń Ulttyq qordan jasaqtalǵanyna alańdaýshylyq bildirip otyrǵanyn málimdedi, dep habarlaidy QazAqparat.
«Úkimet, Ulttyq bank jáne Esep komitetiniń esepterin zerdelei kelip, 2019 jylǵy respýblikalyq biýdjettiń negizgi parametrleri oryndaldy degen qorytyndy jasaýǵa bolady. Búgingi kúni respýblikalyq biýdjet elimizdegi ekonomikalyq belsendilikti qoldaýdyń negizgi tetigi bolyp otyr. Jalpy Úkimet memlekettik baǵdarlamalardyń oryndalýyn aitarlyqtai deńgeide qamtamasyz etti. Sonyń arqasynda kózdelgen maqsattardyń negizgi kórsetkishterine qol jetkizildi. Esep komitetiniń de belsendi jumysyn atap ótkim keledi», - dedi Máýlen Áshimbaev Parlament Senatynyń otyrysynda.
Senat spikeri óz sózinde atqarylǵan jumystarǵa qaramastan olqylyqtar da joq emestigin atap ótti.
«Mysaly tiimsiz jumsalǵan biýdjet qarajatynyń kólemi úsh ese artqan. Esep komiteti ótken jyldary ózge de zańbuzýshylyqtarǵa jol berilgenin anyqtap otyr. Igerilmegen qarjy kólemi de aitarlyqtai ósken. Sondai-aq búgin de Ulttyq qordy úilesimdi basqarý, ásirese onyń saqtalýyn jáne tabystylyǵyn tiisti deńgeige jetkizý máselesi ózekti bolyp otyr. Ulttyq qor qarajatyn paidalaný jaǵdailary artyp, biýdjet kirisiniń shamamen úshten biri osy qordan jasaqtalǵany málim. Bul jaǵdaiǵa depýtattar alańdaýshylyqpen qarap otyr. Ulttyq qordy paidalanýdy azaitý úshin Úkimet biýdjet kirisine basa mán bere otyryp, shyǵyndardyń tiimdiligin qamtamasyz etýi qajet», - dedi ol.
Máýlen Áshimbaev óz sózinde bul rette óńirlerge basa mán bergen jón ekenin jetkizdi.
«Depýtattardyń paiymdaýynsha qoldanystaǵy biýdjet júiesi artyǵymen ortalyqtandyrylǵan. Áli kúnge deiin respýblikalyq biýdjetten bólinetin qarajat óńirlerdegi áleýmettik-ekonomikalyq máselelerdi sheshýdiń basty qarjy kózi bolyp otyr. Mundai biýdjetaralyq qatynas jergilikti biliktiń óńir ekonomikasyn damytýǵa jáne kiris bazasyn keńeitýge degen motivatsiiasyn tómendetedi dep oilaimyz. Sondai-aq óńirlerdegi damýǵa bólinetin qarajat ta keibir jaǵdaida tiimsiz jumsalýda. Sondyqtan barlyq deńgeidegi biýdjet protsesin uiymdastyrý jumysyn jetildirgen abzal. Osyǵan orai aimaqtar deńgeiinde ashyq biýdjetti engizý máselesin qolǵa alǵan durys bolady. Sol arqyly azamattar qarjynyń qaida jumsalyp jatqanyn kórip, óz usynystaryn berip, qarajattyń jumsalýynyń tiimdiligin baǵalaýǵa múmkindik alady. Mundai tájiribeni barlyq biýdjettik mekemege engizgen jón», - dedi Máýlen Áshimbaev.
.jpeg)