Parlament Senatynyń Tóraǵasy Máýlen Áshimbaev koronairýs pandemiiasy men oǵan qatysty daǵdarys jaǵdaiynda qazirgi memlekettik shyǵyndardy qaita qaralýy kerektigin málim etti, dep habarlaidy QazAqparat.
«Qandai máselege nazar aýdarý kerek? Birinshiden Memleket basshysy 2024 jylǵa deiin memlekettik qyzmetkerlerdiń sany men ulttyq kompaniialardyń personaldardyń tórtten birin qysqartý týraly tapsyrma bergen edi. Bul jerde álbette áńgime memlekettik qyzmetkerler shtatyn mehanikalyq turǵyda qysartý, tutas, mobildi ári tiimdiligi joǵary memlekettik apparatty qalyptastyrý kerek. Bul baǵyttaǵy jumysty jalǵastyryp, únemdelgen qarajatty basqa salaǵa paidalansa jón bolar edi. Ekinshiden koronavirýs pandemiiasy tsifrlandyrý men qashyqtan jumys júrgizý arqyly aqshanyń birshama bóligin únemdeýge bolatynyn kórsetti. Máselen qazirdiń ózinde memlekettik apparattyń jartysy qashyqtan jumys istep, ónimdilikti tómendetken emes», - dedi Máýlen Áshimbaev Parlament Senatynyń otyrysynda.
Onyń aitýynsha qazir sharalardyń kóbin onlain rejimde ótkizýge bolady. Izinshe jumystyń bul reti issaparǵa nemese kóliktik shyǵyndarǵa shyǵatyn qarajatty únemdep qalýǵa jol ashady. Sol sebepti memlekettik qyzmetkerler men ulttyq kompaniialardaǵy qyzmetkerlerdiń bir bóligin qashyqtan atqarylatyn jumysqa aýystyryp, ońtailandyrý men shyǵyndardy qysqartý múmkindikterin maqsatty túrde zertteý kerek.
«Jalǵa tólenetin nemese ǵimaratty ustap turý úshin ketetin, kóliktik maqsattaǵy da shyǵyndardy qysqartýǵa múmkindiktiń bar-joǵyn zerttep, zerdeleý kerek. Bul jerde áleýet aitarlyqtai mol. Máselen 2019 jyldyń biýdjetinde elden tys issaparlar men qyzmettik saparlarǵa shyǵatyn shyǵyn 17,5 paiyzǵa ósken. El ishindegi bul baǵyttaǵy shyǵyn 8,8 paiyzǵa ósken. Kóliktik qyzmet tólemi 21 paiyzǵa qymbattaǵan. Úshinshiden qazirgi jaǵdaida memlekettiń strategiialyq mańyzy joq shyǵyndaryn da qysqartý kerek. Máselen buǵan konsaltingti jáne zertteý qyzmetterine shyǵatyn shyǵyndardy jatqyzýǵa bolady», - dedi ol.
Máýlen Áshimbaev 2019 jyldyń biýdjetinde bul maqsatta 43 mlrd teńge jumsalǵanyn eske saldy.
«Jalpy pandemiia men oǵan qatysty daǵdarys qazirgi memlekettik shyǵyndardy qaita qaraýǵa sebep bolýy tiis. Osylaisha shyǵyndardy ońtailandyryp, qarajatty damý maqsatyna jumsap, azamattardyń ómir sapasyn arttyrý kerek», - dedi ol.
