Bul týraly búgin «Nur Otan» partiiasynyń Ortalyq apparatynda ótken otyrysta belgili boldy. Atalǵan jiynda partiianyń mektep ashanalaryn jańǵyrtyp, balalardyń durys tamaqtanýyn qamtamasyz etýge baǵyttalǵan jańa jobasyn tiimdi júzege asyrý máseleleri sóz boldy.
Aldymen, elimizde mektep jasyndaǵy balalar arasynda as qorytý júiesine qatysty aýrýlardyń kóbeigenine nazar aýdarǵan jón. Odan bólek, 14 jasqa deiingi jasóspirimderdiń 21,5 paiyzy, iaǵni árbir besinshi jas jetkinshek artyq salmaqtyń zardabyn tartyp otyr. Mundai másele negizinen durys tamaqtanbaý saldarynan týyndap otyrǵanyn aitqan «Nur Otan» partiiasy Tóraǵasynyń Birinshi orynbasary mektepterdegi as máziriniń shyn máninde kóńil kóńshitpeitinin, oqýshylarǵa kóbine un ónimderi men quramynda qanty kóp túrli táttiler usynylatynyn jetkizdi.
Bul máseleniń salamatty ult bolyp qalyptasýymyzǵa tikelei áser etetinine nazar aýdarǵan Máýlen Áshimbaev ony sheshýdiń naqty baǵyttaryna toqtaldy.
– Birinshiden, mektep ashanalarynda ǵylymi negizge súiengen jáne paidaly ári dámdi taǵam túrleri usynylǵan tamaqtanýdyń biryńǵai standartyn engizý qajet. Ekinshiden, tamaqtaný úderisin uiymdastyrýdyń utymdy tásili daiyndalýy kerek. Bul jerde memlekettik-jekemenshik áriptestiktiń, tamaqtaný kombinattarynyń jáne jeke kásipkerlerdiń bastamalaryn eskerip, eń tiimdisin respýblikalyq deńgeide júzege asyrǵanymyz jón. Úshinshiden, tamaqtaný standartynyń júzege asyrylýyna qoǵamdyq baqylaý júrgizý máselesi. Bul jumysqa ata-analar, úkimettik emes uiymdar, saiasi partiialar belsendi qatyssa, naqty júie qalyptasar edi. Tórtinshiden, buqaralyq aqparat quraldarymen, sarapshylarmen, qoǵam belsendilerimen birlesip, oqýshylar men ata-analar arasynda, jalpy qoǵamda durys tamaqtaný mádenietin qalyptastyrýdyń bereri mol, – dedi Máýlen Áshimbaev.
Sonymen qatar «Nur Otan» partiiasy Tóraǵasynyń Birinshi orynbasary elimizdiń bes birdei oblystarynda ashanasy nemese býfeti joq mektepterdiń bar ekenin, sonyń saldarynan balalardyń durys tamaqtanýyna jaǵdai jasalmai otyrǵanyn tilge tiek etti. Búginde elimizde osyndai 538 mekteptiń bar ekeni belgili bolyp otyr.
Aita keteiik, jiyn barysynda Densaýlyq saqtaý ministrligi Qoǵamdyq densaýlyq saqtaý komitetiniń tóraǵasy Jandarbek Bekshin, Bilim jáne ǵylym minitrligi Balalar quqyǵyn qorǵaý jónindegi komitet tóraǵasynyń orynbasary Erjan Ersaiynov, basqa da memlekettik organ ókilderi, qoǵam belsendileri men sarapshylar jáne ata-analar pikir bildirip, máseleni tiimdi sheshýge baǵyttalǵan usynystarymen bólisti.
