Búgin «Nur Otan» partiiasy Tóraǵasynyń birinshi orynbasary Máýlen Áshimbaev EQYU Demokratiialyq institýttar jáne adam quqyqtary jónindegi biýrosynyń sailaý jónindegi keńesshileri Radivoia Grýich jáne Vladimir Misevpen, sondai-aq, EQYU Parlamenttik assambleiasynyń ókili Dimitrii Todorichpen kezdesti, dep habarlaidy "Ult aqparat".
Partiia baspasóz qyzmetiniń málimetinshe, kezdesýde taraptar aldaǵy Qazaqstan Respýblikasy Prezidentiniń kezekten tys sailaýyna qatysty máselelerdi talqylady.
«Nur Otan» partiiasy Tóraǵasynyń birinshi orynbasary Qazaqstannyń táýelsizdiktiń alǵashqy jyldarynan bastap EQYU-nyń halyqaralyq qaýipsizdikti saqtaý, beibitshilikti qamtamasyz etý, adam quqyqtaryn qorǵaý jáne demokratiialyq tetikterdi ilgeriletýge baǵyttalǵan saiasatyn qoldap kele jatqanyn aitty. Sondai-aq ol qazirgi tańda Qazaqstan men EQYU arasyndaǵy qarym-qatynastyń kúsheie túskenine nazar aýdardy.
«Qazaqstannyń EQYU-men yntymaqtastyǵy elimizdiń osy uiymǵa tóraǵalyq etken kezeńinde burynǵydan da nyǵaia tústi. Sol kezde qabyldanǵan Astana deklaratsiiasy uiymnyń damýyna tyń serpin bergen mańyzdy qujat boldy», - dedi Máýlen Áshimbaev.
Sonymen qatar ol EQYU-nyń barlyq standarttary Qazaqstannyń memlekettik baǵdarlamalary úshin negizgi baǵdar bolyp sanalatynyn tilge tiek etti.
Onyń aitýynsha, Qazaqstan úshin EQYU-men, uiymnyń Demokratiialyq institýttar jáne adam quqyqtary jónindegi biýrosymen jáne basqa da qurylymdarymen yntymaqtastyqty odan ári nyǵaitý asa mańyzdy. Sondyqtan ol aldaǵy ýaqytta ekijaqty qarym-qatynastyń dami túsetinine senim bildirdi. Munan bólek, M.Áshimbaev dál qazir qazaqstandyqtardyń tarihi kezeńdi bastan ótkerip jatqanyna nazar aýdaryp, Nursultan Ábishuly Nazarbaev Qazaqstan Prezidenti retindegi ókilettigin toqtatqanymen, «Nur Otan» partiiasynyń Tóraǵasy bolyp qala beretinin jetkizdi.
«Bizdiń partiia Elbasymyz aiqyndap bergen elimizdiń barlyq strategiialyq maqsattaryna qol jetkizý jolyndaǵy jumystaryn jalǵastyra beredi. Sondyqtan aldaǵy prezident sailaýyna belsendi túrde qatysamyz. Kelesi aptada ótetin partiianyń kezekten tys XIX sezinde sailaýǵa qatysatyn kandidatymyzdy usynamyz. «Nur Otan» sailaýdyń ashyq ári ádil ótýine jáne barlyq demokratiialyq normalardyń saqtalýyna múddeli. Óitkeni bul bilik sabaqtastyǵyn qamtamasyz etetin tetikterdiń biri bolyp sanalady», - dedi Máýlen Áshimbaev.
Óz kezeginde EQYU Demokratiialyq institýttar jáne adam quqyqtary jónindegi biýrosynyń sailaý jónindegi keńesshisi Radivoia Grýich elimizge Qazaqstannyń Syrtqy ister ministrliginiń usynysy boiynsha kelgenderin aitty.
«Biz munda sailaýǵa qatysty keibir talaptarǵa baǵalaý jumystaryn júrgizip, aldaǵy saiasi naýqanǵa daiyndyqtyń qazirgi deńgeiin baǵamdaimyz. Sondai-aq Uiymnyń atynan sailaýǵa baiqaýshylar jiberý isin pysyqtap, Qazaqstannyń birqatar memlekettik organdarymen, buqaralyq aqparat quraldarymen jáne saiasi partiia ókilderimen kezdesýler ótkizemiz», - dedi Radivoia Grýich.
