.jpg)
Foto: Aijan Alhabek
Jihankez jýrnalist Dinara Bolattyń ózge paiymy Ult.kz-te.
Ulttyq kiim kiiý jyldan jylǵa sánge ainalyp kele jatqany kópshilikti qýantady. Qazirgi tańda jas juldyzdardan bastap, qoǵamdyq pikir ielerine deiin ultymyzdyń bolmysyn aishyqtap, kóptiń aldyna ulttyq kiimmen shyǵyp júrgeni ádemi desedi. Naýryznamanyń onkúndigin, sonyń ishinde 18-shi naýryzdy «Ulttyq kiim kiiý kúni» dep belgilengeli bul jaqsy ádet kólemdi merekege ainaldy. Prezidentimiz Qasym-Jomart Kemeluly Toqaev ul -qyzdarymyz ulttyq kiimdi tek merekede emes, udaiy kiip júrse de jarasymdy bolatynyn aitqan edi. Sáikesinshe, ulttyq kiim kiiýdi memlekettik deńgeide nasihattai bastaǵan soń, naryqta oǵan suranys artty.
Aqtóbelik «Syrmaq» brendiniń tiginshi-dizaineri Inabat Eskendir úshin ulttyq kiimdi kópshilikke usyný jai ǵana kásip emes, túp tamyrymyzdy tabýǵa ulttyq kiim arqyly úles qosý. Ol bul isti ómirlik missiia kóredi.
«Álbette mereke aldynda ulttyq kiimge suranys artady. Biraq biz tigetin syrmaqtardy syilyqqa, ózine, ne bolmasa shetelge kiiýge dep jyl boiy suratady. Suranys artqan saiyn qoldanys aiasy men assortimentti kóbeitý úshin eńbektenip jatyrmyz. Kásibimniń maqsaty — ulttyq kiimdi zamanaýi úlgide usyný jáne naýryz ben juma kúni ǵana emes, kúnde uialmai, maqtanyshpen kiip júrýimizge úlesimdi qosý. Missiiam sol. Jastardyń saýatty, ultjandy ekenin kórsem máz bolamyn», — deidi Inabat Eskendir.
Foto: Aijan Alhabek
Iá, jyl saiyn kóneniń kózin jańǵyrtyp, jańa ideialarmen tolyqqan túrli ulttyq kiimderge tańdaý kóbeidi. Túrli baǵa, túrli sapa. Alaida kópshilik sapaly matadan, erekshe dizainmen tigiligen ulttyq kiimder halyq úshin qoljetimsiz, baǵalary qymbat dep renish bildiredi.
Sapaly ulttyq kiim ne úshin qymbat ekenin sońǵy jyldary naryqta qyz kelinshekter arasynda suranysqa ie bop júrgen «Zeine» etno brendiniń tiginshi dizaineri Baqytgúl Kósherbaidan surap kórdik:
«Iá, kelisemin, ulttyq naqyshtaǵy sapaly kiimderdiń baǵasy joǵary bolyp jatady. Onyń basty sebebi, bizdegi óndiristiń tolyq damymaýy. Matalardyń jetispeýshiligi men sapaly materialdardyń qymbat bolýy, óndiris oryndarynyń azdyǵy, sondai-aq keibir detaldi qolóner jumystarynyń kóp eńbekti qajet etýi — barlyǵy baǵaǵa tikelei áser etedi.
Sonymen qatar, erekshe matalardy shetelden arnaiy tapsyryspen aldyrý qajettigi de ózindik úlesin qosady. Keibir buiymdarymyzdyń jaryqqa shyǵýy 6 aiǵa deiin sozylýy múmkin. Sebebi ár kezeńi muqiiat josparlaýdy jáne joǵary sapany talap etedi. Syzba jumystarynyń ózi uzaq ýaqyt alady. Al erekshe, ári sapaly ónim jasaý úshin basqa da dizainerlermen birlese jumys isteimiz. Osy faktorlardyń barlyǵy ulttyq kiimderdiń baǵasyna áser etedi. Biz múmkindiginshe qoljetimdi ári ádemi dúnielerdi shyǵarýǵa tyrysyp jatyrmyz», — deidi dizainer.
PAIYM
Ulttyq kiim kiiýge jastardyń da, úlkenderdiń de yntasy zor. Ulttyq kiimniń túrli úlgisine ony kiip júretin óz tutynýshylary da tabylyp júr. Naryq jyldan jylǵa ulǵaiyp keledi. Ulttyq kiim tigýshi dizainerler arasynda báseke bar bolǵandyqtan, sapa da bar. Bar másele ádemi úlgide tigilgen, sapaly ulttyq kiim kigisi keletin umtylystyń keide qalta shamasymen sáikes kelmeýinde. Sol sebepti mamandar ulttyq kiim kiiýdi memlekettik deńgeide nasihattap qana qoimai, ony kópshilikke qoljetimdi etetindei mata, shikizat shyǵaratyn óndiris oryndaryn ashý basty qajettilik bop turǵanyn aitady. Bul másele sheshilgende ǵana kiimge qajet túrli usaq detal, matalar kórshi Qytai, Ózbekstan, Qyrǵyzstan, Túrkiiadan satyp alynbai, tolyq óz jerimizde óndirilip, tigilgen dep ataýǵa keletin edi. Sonda ǵana ulttyq kiimdi kiip júrgen ár qazaqtyń eńsesi tiktelip, ózimen birge týǵan jeriniń bir bólshegin erekshe maqtanyshpen alyp júrer edi. Sol kúnge jeteiik.
.jpg)
