Búgin Ortalyq sailaý komissiianyń otyrysynda OSK tóraǵasynyń orynbasary Konstantin Petrov máslihattar depýtattarynyń kezekti sailaýy týraly túsinik berdi, dep habarlaidy QazAqparat.
Onyń aitýynsha, barlyq deńgeidegi máslihattar depýtattarynyń kezekti sailaýy bir mezgilde ótkiziledi jáne merzimi jaǵynan Prezidentti, Parlament Senaty depýtattaryn sailaýmen tuspa-tus kelmeýge tiis.
Máslihattar depýtattaryn sailaýdy QR Parlamenti Májilisi depýtattaryn sailaýmen bir mezgilde ótkizý boiynsha shekteýler joq.
«Osyǵan bailanysty máslihattar depýtattarynyń kezekti sailaýyn 2021 jylǵy 10 qańtarǵa taǵaiyndaý usynyldy.
Májilis depýtattary men máslihat depýtattaryn sailaýdy birge ótkizý qoldanystaǵy zańnamaǵa qaishy kelmeidi jáne qazirgi jaǵdaida obektivti negizdelgen sheshim bolyp otyr. Biriktirilgen naýqan - bul biýdjetti únemdeý jáne pandemiia jaǵdaiynda áleýmettik bailanystardy azaitý», - dedi OSK tóraǵasynyń orynbasary.
Jalpy, aldaǵy naýqanda 216 máslihattyń 3276 depýtaty sailanýǵa tiis. Osy oraida oblystardyń, Nur-Sultan, Almaty jáne Shymkent qalalary máslihattarynyń 589 depýtaty, oblystyq mańyzy bar qalalardyń 36 máslihatynda 596 depýtat, aýdandardyń 163 máslihatynda 2091 depýtat qamtylmaq.
Sonymen qatar Ortsailaýkom múshesi Erlan Daýylbaev Qazaqstan Respýblikasy máslihattary depýtattarynyń kezekti sailaýyn ázirleý sharalary týraly baiandady.
Ol óz sózinde máslihattar depýtattaryn sailaý boiynsha aldaǵy sailaý naýqanynyń birqatar erekshelikteri bar ekenin atap ótti. Birinshiden, máslihatqa sailaý alǵash ret saiasi partiialardyń partiialyq tizimderi boiynsha ótýde. Ekinshiden, sailaý týraly Konstitýtsiialyq zańdaǵy ózgeristerge sáikes, tiisti ákimshilik-aýmaqtyq birliktiń aýmaǵynda máslihattar depýtattaryn sailaý kezinde biryńǵai aýmaqtyq sailaý okrýgi qurylady.
Máslihat depýtaty bolyp jiyrma jasqa tolǵan Qazaqstan Respýblikasynyń azamaty sailana alady. Respýblika azamaty bir máslihattyń ǵana depýtaty bola alady.
Osyǵan sáikes depýtattyqqa kandidattardy usyný kezeńi 2020 jylǵy 10 qarashadan bastap 2020 jylǵy 4 jeltoqsanda jergilikti ýaqyt boiynsha saǵat 18:00-ge deiin jalǵasady.
Máslihattar depýtattyǵyna kandidattardy tirkeý 2020 jylǵy 10 jeltoqsanda jergilikti ýaqyt boiynsha saǵat 18:00-de aiaqtalady.
Sailaý aldyndaǵy úgit-nasihat 2020 jylǵy 10 jeltoqsanda jergilikti ýaqytpen saǵat 18.00-den keiin bastalady jáne 2021 jylǵy 9 qańtarda aiaqtalady.
