Máslihattar men ondaǵy depýtattardyń jumys tetikterin ózgertý mańyzdy. Mundai pikirdi «Alternativa» mańyzdy zertteýler ortalyǵynyń direktory, saiasattanýshy Andrei Chebotarev bildirdi, dep habarlaidy "Ult aqparat" saiasattanýshynyń Facebook paraqshasyna silteme jasap.
«Proportsionaldy júie negizinde barlyq deńgeidegi máslihattar depýtattarynyń sailaýyn ótkizý - óz óńirindegi aimaqtyq (oblystar, aýdandar, respýblikalyq mańyzy bar qalalarda) jáne jergilikti (oblystyq deńgeidegi qalalarda) parlamentti shynynda da jumys isteitin organdarǵa ainaldyrǵan jaǵdaida ǵana ónimdi bolady. Biraq qazir birqatar faktige bailanysty bul organdar is júzinde ákimderdiń baqylaýynda tur. Ondaǵy depýtattar kóbinese óz sharýasymen álek. Sondyqtan olardyń jumysy halyqtyń edáýir bóligine kórinbeidi, BAQ úshin qyzyqty emes», - dep jazady saiasattanýshy.
Resmi statistikaǵa sáikes, Qazaqstanda 3 074 depýtaty bar 216 oblystyq, aýdandyq jáne qalalyq máslihattar jumys isteidi. Sonymen birge olardyń basym kópshiligi «Nur Otan» partiiasynyń músheleri. Saralap qaraǵanda munda kóbinese biznes ókilderi basym (35,1%). 51-60 jas aralyǵyndaǵy toptyń basymdyǵy (42,1%) baiqalady. Al jasy 60 jastan asqan adamdardyń úlesi - 29,8%. Máslihat depýtattary arasynda 30 jasqa deiingi jastardyń úlesi 2,7% ǵana quraidy. Áiel depýtattardyń sany 26,1%-dyq úleske ie.
«Quramdy kórip otyrsyzdar. COVID-19 pandemiiasynyń sharyqtaý sheginde jergilikti ókildik basqarý júiesinde belgili bir vakýmnyń bary anyq baiqaldy. Muny praimeriz ótkizip otyrǵan partiianyń basshylyǵy da eskergen siiaqty. Praimerizge partiia depýtattarynyń jartysynan azy (1 410 adam) qatysty. Onyń ishinde 1 197 adam partiiaishilik irikteýdiń kelesi kezeńine ótti. Sonymen birge, osy jyldyń 10 men 17 qarashasy aralyǵynda ár túrli aimaqtarda ótetin partiialyq konferentsiialarda taǵy birnesheýi alynyp tastalýy múmkin. «Nur Otan» partiiasy tóraǵasynyń birinshi orynbasary Baýyrjan Baibek máslihattar úshin partiialyq tizimniń 60%-dan astam jańartylady dep kútedi. Ár túrli máslihattarda usynylǵan basqa partiialardyń bul turǵyda ózin qalai ustaityny áli belgisiz. Degenmen, olar da óz depýtattarynyń quramyn túbegeili ózgertýge bel býǵan bolýy múmkin», - deidi Andrei Chebotarev.
