17 qańtar kúni keshke Germaniiadan Máskeýge ushyp kelgen "Kreml synshysy" Aleksei Navalnyidy keden qyzmetinen ótý sátinde ustap áketti.
"Nastoiashee vremia" telearnasynyń málimetinshe, Jazany oryndaý jónindegi federaldyq qyzmeti Navalnyidyń ustalǵanyn rastaǵan, dep jazady Azattyq.
Germaniiaǵa es-tússiz jetkizilgen Navalnyi sodan beri sol elde bolyp, 13 qańtar kúni «Pobeda» áýe kompaniiasynyń reisimen oralatynyn málimdegen.
Ótken aida Jazany oryndaý jónindegi federaldyq qyzmeti Navalnyidan dereý oralýdy talap etti, bolmasa qamaýǵa alynatynyn málimdedi.
Reseidiń oppozitsiialyq saiasatkeri 20 tamyz kúni Tomskiden Máskeýge baǵyt alǵan ushaqta háli nasharlap, esinen tanǵan. Ushaq ekipajy shuǵyl túrde jol boiyndaǵy Ombynyń áýejaiyna qonyp, saiasatkerdi sol jerden jedel járdem qyzmeti jergilikti aýrýhanaǵa alyp ketti.
Eki kúnnen keiin arnaiy sanaviatsiia komada jatqan Navalnyidy Germaniiada alyp ketti. Reseilik saiasatkerdi «Sharite» klinikasynda emdedi.
2 qyrkúiek kúni Germaniia biligi Navalnyidyń «Novichok» ýymen ýlanǵanyn málimdedi. Al 7 qyrkúiek kúni Kreml synshysy komadan shyǵyp, ózine kele bastady. Esin tolyq jiǵan kezde Navalnyi ózin qasaqan ýlaǵanyn, onyń artynda tek Pýtin ǵana turýy múmkin ekenin málimdegen.
Ótken jylǵy jeltoqsannyń ortasynda Bellingcat zertteý toby men birqatar baspasóz quraly birlese júrgizgen jýrnalistik zertteýin jariialap, Navalnyidy ýlaýdyń artynda FSB qyzmetkerleri tur dep málimdedi.
17 jeltoqsan kúni Resei prezidenti baspasóz máslihatynda Navalnyidyń ýlanýy týraly suraqqa "Óltirgimiz kelse, óltirer edik. Ol kimge kerek edi ózi" dep mysqylmen jaýap bergen.
Bir aptadan keiin, 21 jeltoqsan kúni Aleksei Navalnyidyń ýlaý operatsiiasyna qatysy bar FSB agenti degen adammen telefon áńgimesi jariialandy. Onda FSB agenti ýdyń izin jasyrýǵa árekettengenin moiyndaǵan.
Berlinnen Máskeýge ushqan ushaqta Navalnyimen birge onyń áieli Iýliia, baspasóz hatshysy Kira Iarmysh jáne advokaty Olga Mihailova jáne kóptegen jýrnalist boldy. Olar ushaq áýege kóterilgenshe habar taratyp, odan áýejaiǵa qonǵan sátte efirge qaita shyqty.
Ushaq "Vnýkovo" áýejaiyna qonýy kerek bolǵan. Áýejaiǵa saiasatkerdiń kóptegen jaqtasy jinaldy, politsiia áýejaidy ainalasyn "avtozakpen" toltyryp, Navalnyi jaqtastaryn birtindep ustap jatty.
Qoný ýaqyty taiaǵanda áýedegi ushaqtardyń ushý baǵytyn tirkep otyr Flightradar24.com qyzmeti áýejaidyń baǵytyn ózgertkenin kórsetti. "Pobeda" áýe kompaniiasynyń ushaǵy aqyry "Sheremetevo" áýejaiyna qondy.
Navalnyidy keden qyzmetinen óter kezde ustap áketti. Oǵan deiin ol jýrnalisterdiń suraǵyna jaýap berip úlgergen.
"Eń áýeli jolaýshylardan keshirim suraǵym keledi" dep bastady Navalnyi. "Oralý-oralmaý týraly suraq bolǵan emes. Men baqyttymyn. Bul – eń keremet kún. Bul – meniń úiim, men qoryqpaimyn" dedi Navalnyi jýrnalisterge.
12 qańtar kúni Jazany oryndaý jónindegi federaldyq qyzmet Máskeý qalasy Simonovsk aýdanynyń sotyna júginip, Aleksei Navalnyidyń shartty jazasyn qamaýǵa aýystyrýdy suraǵany belgili boldy. Ótinish sodan bir kún berilgen. Navalnyiǵa shartty jaza úkimi "Iv Roshe isi" boiynsha kesilgen jáne onyń merzimi 30 jeltoqsanda aiaqtalǵan. Eýropanyń adam quqyqtary jónindegi soty istiń saiasi astary bar dep tanyǵan.
