Máskeýdegi Lefortovskii soty oppozitsioner Aleksei Navalnyidy "alaiaqtyq jasady" jáne "sotqa qurmet kórsetpedi" degen aiyppen toǵyz jylǵa qatań rejimdegi túrmege qamady jáne 1,2 mln rýbl aiyppul saldy.
Buǵan deiin memlekettik aiyptaýshy Navalnyidy 13 jylǵa sottaýdy jáne oǵan 1,2 mln rýbl aiyppul salýdy suraǵan edi.
Resei Navalnyidy "Jemqorlyqpen kúres qoryna" aýdarylǵan aqshany óz qajetine jumsady jáne osyǵan deiingi sottarda sýdia, prokýrorǵa jala japty dep aiyptaǵan.
Oppozitsioner men onyń jaqtastary bul qylmystyq isti "absýrd" dep atady.
Navalnyi – Resei prezidenti Pýtindi ashyq synap júrgen saiasatker ári Resei oppozitsiiasynyń lideri. Onyń "Jemqorlyqpen kúres qory" Pýtin men Pýtinniń ainalasyndaǵy shendilerdiń korrýptsiiaǵa qatysy baryn dáleldeitin kóptegen zertteý jariialaǵan.
Aleksei Navalnyi 2020 jylǵy 20 tamyzda Tomskiden Máskeý bara jatqan ushaqtyń bortynda esinen tanyp, aldymen Omby aýrýhanasyna, keiin Germaniiadaǵy "Sharite" klinikasyna jetkizilgen. Bellingcat zertteý toby birneshe basylymmen birlese júrgizgen zertteýin jariialap, Navalnyidy Resei federaldyq qaýipsizdik komiteti qyzmetiniń (FSB) arnaiy toby ýlaǵan dedi.
Saiasatker 2020 jyly qyrkúiektiń basynda komadan shyǵyp, Reseige oralǵanda Resei politsiiasy ony áýejaidan ustap, qamaǵan. Sodan beri Navalnyi qamaýda otyr.
