Sheremetevo áýejaiynan ushyp bara jatqan «Máskeý-Afiny» baǵytyndaǵy ushaq er adamdy qaǵyp ketip, mert qyldy, dep habarlaidy «QazAqparat» TASS agenttigine silteme jasap.
«Sheremetevo áýejaiynda Máskeý-Afiny baǵytymen ushqaly jatqan áýe kemesiniń ekipajy ushyp-qoný jolaǵynyń boiymen qozǵalyp bara jatqan kezinde jergilikti ýaqyt boiynsha saǵat 20:10-da belgisiz zatpen soqtyǵysqany týraly habar bergen. Oqiǵa ornyn tekserý faktisi barysynda onda er adamnyń óli denesi, kiimi jáne ózge de jeke zattary tabyldy», - dedi áýejaidyń qoǵammen bailanys direktsiiasynyń basshysy Anna Zaharenkova.
Onyń aitýynsha, oqiǵa ornyna «Apattar meditsinasy» ortalyǵy men jedel járdem brigadalary, aviatsiialyq qaýipsizdik jáne kóliktik politsiia qyzmetteri dereý kelip jetken.
«Qaza bolǵan er adamnyń aty-jóni anyqtaldy, aqparat tiisti jedel is-sharalardy ótkizý úshin politsiiaǵa jiberildi» dep naqtylady ol.
Atalǵan fakti boiynsha tekserý jumystary bastaldy. Oqiǵa ornynda tergeý-jedel toby jumys istep jatyr.
Prokýratýra, sondai-aq, Sheremetevo áýejaiyndaǵy ushyp-qoný jolaǵynda er adamnyń óliminen keiin aviatsiialyq qaýipsizdikti qamtamasyz etý týraly zań talaptarynyń oryndalýyn tekserýdi bastady. Tekserý qorytyndysy boiynsha, negizdemeler bar jaǵdaida tiisti prokýrorlyq eleý sharalaryn qabyldaý máselesi sheshiledi.
