15 qazanda Qazaqstan Respýblikasynyń Resei Federatsiiasyndaǵy elshiliginde qazirgi qazaq poeziiasy men prozasy antologiiasynyń orys tilindegi nusqasynyń tusaýkeser rásimi ótti, dep habarlaidy "Ult aqparat".
Qazaq ádebieti jinaǵynyń orys tiline aýdarmasy men basylymyn kórkem aýdarma salasyndaǵy tájiribeli reseilik mamandardyń qatysýymen Resei jazýshylar odaǵynyń Máskeý qalalyq bólimshesi men Máskeý memlekettik ýniversitetiniń baspasy oryndady. Antologiialarǵa alǵysózdi Reseidiń akademiialyq qoǵamdastyǵynyń kórnekti ókilderi jazdy. Mysaly, proza antologiiasyna Máskeý memlekettik ýniversiteti filologiia fakýltetiniń prezidenti, filologiia ǵylymdarynyń doktory Marina Remniova alǵysóz arnasa, qazirgi qazaq poeziiasynyń jinaǵyna alǵysóz jazǵan – A.M. Gorkii atyndaǵy Álem ádebieti institýtynyń direktory, filologiia ǵylymdarynyń doktory Vadim Polonskii.
Máskeý memlekettik ýniversiteti baspasynan jaryq kórgen qazaq prozasy men poeziiasynyń jinaqtary orys tilinde sóileitin 14 memlekettiń 3,5 myńnan asa kitaphanasyna, ýniversitetteri men ǵylymi ortalyqtaryna jetkiziledi.
Tanystyrylymǵa Resei Federatsiiasy Prezidentiniń aimaqaralyq jáne mádeni bailanystar basqarmasynyń basshysy Vladimir Chernov, Resei jazýshylar odaǵynyń basshylyǵy, sondai-aq aýdarmashylar, ádebi redaktorlar, synshylar men sholýshylar qatysty. Qazaqstan tarapynan sharaǵa QR Prezidentiniń kómekshisi, «Rýhani jańǵyrý» baǵdarlamasyn júzege asyrý boiynsha Ulttyq komissiia hatshysy Aida Balaeva, QR Resei Federatsiiasyndaǵy Tótenshe jáne ókiletti elshisi Imanǵali Tasmaǵambetov, Ulttyq aýdarma biýrosynyń atqarýshy direktory Raýan Kenjehanuly, Qazaqstan Jazýshylar odaǵy tóraǵasynyń orynbasary Aqberen Elgezek qatysty.
Zamanaýi qazaq ádebietiniń úzdik úlgileriniń BUU 6 tiline aýdarmasy «Jahandaǵy zamanýi qazaqstandyq mádeniet» jobasy aiasynda júzege asyp otyrǵany málim. Joba, óz kezeginde, Qazaqstan Respýblikasynyń Tuńǵysh Prezidenti – Elbasy N.Nazarbaevtyń bastamasymen qolǵa alynǵan «Rýhani jańǵyrý» baǵdarlamasynyń mańyzdy baǵyty bolyp tabylady. «Jahandaǵy zamanýi qazaqstandyq mádeniet» jobasynyń mindeti – qazirgi zamanǵy Qazaqstannyń ádebiet, mýzyka, beineleý óneri, horeografiia, kino jáne teatr salalaryndaǵy mádeni qazynalaryn álem jurtshylyǵyna tanystyrý.
Tanystyrylym saltanatynda sóz sóilegen Aida Balaeva jobanyń 2017 jyly sáýir aiynda Tuńǵysh Prezident Nursultan Nazarbaev usynǵan «Rýhani jańǵyrý» baǵdarlamasynyń aiasynda júzege asyp jatqanyn jetkizdi.
«Onyń ózeginde zamanaýi álemde ulttyń básekege qabilettiligi onyń mádeni jáne intellektýaldyq potentsialymen ólshenedi degen oi jatyr. Búgingi tusaýkeser «Jahandyq álemdegi zamanaýi qazaqstandyq mádeniet» jobasynyń aiasyndaǵy jumystyń jemisi. Ol qazaqstandyq ádebiet, mýzyka, beineleý óneri, teatr jáne kino týyndylaryn álemge tanystyrýǵa baǵyttalǵan. Búgingi jobamyz júieli túrde jalǵasyn taýyp, mádeniet aralyq qarym qatynastardyń ulǵaiýyna negiz bolady degen senimdemin. «Rýhani jańǵyrý» baǵdarlamasynyń aiasynda 60 qazaqstandyq avtordyń tańdamaly shyǵarmalary tuńǵysh ret birden álemniń negizgi alty tiline aýdarylyp otyr. Jobany júzege asyrýǵa Ulybritaniia, Frantsiia, Ispaniia, Egipet, Qytai jáne Reseidiń jetekshi baspa uiymdary atsalysty. Antologiialar álemniń 90-nan asa eline, bes qurlyqqa taraidy. Iaǵni, buryn-sońdy dúniejúzi oqyrmandarynyń qolyna túspegen qazaq ádebietiniń úzdik úlgilerimen 2,6 mlrd adam tanysýǵa múmkindik alady», – dedi Aida Balaeva.
Aita keterligi, «Rýhani jańǵyrý» baǵdarlamasynyń bir baǵyty – «Jahandaǵy zamanaýi qazaqstandyq mádeniet» jobasy aiasynda qazirgi qazaq ádebietiniń eki antologiiasy aýdarylyp, jaryq kórdi. Olar – «Qazirgi qazaq prozasynyń antologiiasy» jáne «Qazirgi qazaq poeziiasynyń antologiiasy». Ár antologiianyń kólemi – shamamen 500 bettei, árqaisysyna 30 qazaqstandyq avtordyń tańdamaly shyǵarmasy endi.
