Tanymal bankir Jomart Ertaev Resei azamattyǵyn alýdy surady.
Beisenbi kúni Máskeýde sot otyrysy bolyp, ony qamaýǵa alý máselesi qaraldy, dep habarlaidy RIA Novosti.
"Sot qabyldaǵan sheshim boiynsha, qosymsha aiǵaqtardy, onyń ishinde RF azamattyǵyn alý týraly ótinishin qaraý qorytyndysy usynylǵansha Ertaevty ustaý merzimi uzartyldy", — dep, sýdia merzimdi 13 mamyr saǵat 20.00-ge deiin uzartty.
Máskeý prokýratýrasy Qazaqstanda halyqaralyq izdeýde júrgen Ertaevty eline ekstraditsiialaý úshin bultartpaý sharasy retinde 16 maýsymǵa deiin qamaýǵa alýdy surady.
Bankir 8 mamyrda Máskeýde ustalǵan bolatyn. Asa iri kólemde alaiaqtyq jasaǵany úshin Jomart Ertaevqa halyqaralyq izdeý salynǵan.
Munyń aldynda Qazaqstannyń Ishki ister ministrliginiń ókilderi qazaqstandyq bankir ári kásipker Jomart Ertaevtyń ne sebepti ustalǵanyn aitqan bolatyn.
"Ol "Bank RBK" AQ direktorlar keńesiniń tóraǵasynyń keńesshisi bola otyryp, kelisilgen JShS-larǵa 80 million dollar kóleminde banktik qaryz berýdi lobbilegen, sondai-aq, alǵan qarajattardy aldaǵy ýaqytta qaitarmaý maqsatynda áreket etken", - dep habarlaǵan edi ministrlik ókilderi.
Qazirgi ýaqytta Ertaevty Qazaqstanǵa ekstraditsiialaý máselesi sheshilip jatyr. Ertaevtyń qorǵaýshylary sotqa onyń halyqaralyq issaparda júrgenin jáne jasyrynbaǵanyn málimdedi.
