Qazaqstan Respýblikasynyń Syrtqy ister ministri Beibit Atamqulov Túrikmenstannyń tóraǵalyǵymen Máskeýde ótken Táýelsiz Memleketter Dostastyǵy Syrtqy ister ministrleri keńesiniń kezekti otyrysyna qatysty.
Is-shara barysynda syrtqy saiasi vedomstvolarynyń basshylary Dostastyq aiasyndaǵy ózara is-qimyldyń ózekti máselelerin talqylady. Negizgi nazar TMD-ǵa qatysýshy memleketterdiń qazirgi zamanǵy qaýip-qaterlerge qarsy turý jónindegi yntymaqtastyǵyn nyǵaitýǵa, sondai-aq ekonomikalyq, mádeni-gýmanitarlyq jáne ǵylymi-tehnikalyq salalardaǵy ózara is-qimyldy keńeitýge aýdaryldy.
Delegatsiia basshylary 2018 jyly TMD sheńberinde kópdeńgeili SIM-aralyq konsýltatsiialar josparyn iske asyrý qorytyndylary týraly esepti tyńdap, 2019 jylǵa arnalǵan jańa Jospardy bekitti. Bul qujatqa sáikes, syrtqy saiasi josparlaýǵa, qazirgi zamanǵy qaýip-qaterlerge qarsy is-qimylǵa, qarýsyzdaný taqyrybyna, ekonomikalyq yntymaqtastyqty damytýǵa, aqparattyq saladaǵy ózara is-qimylǵa, sondai-aq BUU, Eýropadaǵy Qaýipsizdik jáne Yntymaqtastyq Uiymy jáne Eýropa Odaǵy siiaqty halyqaralyq uiymdarmen yntymaqtastyqqa qatysty konsýltatsiialar ótkizý josparlanǵan.
«Qazaqstan TMD-nyń senimdi jáne belsendi qatysýshysy bola otyryp, Dostastyqqa qatysýshy memleketter arasyndaǵy ózara tiimdi yntymaqtastyqty barlyq salalarda damytýdy jalǵastyrýǵa baǵyttalǵanyn» - dedi otyrys barysynda B. Atamqulov.
Qazaqstan syrtqy saiasi vedomstvosynyń basshysy júrgizilgen birlesken jumystyń arqasynda Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń TMD-nyń qazirgi zamanǵy jaǵdailarǵa beiimdelýi týraly bastamasy tabysty iske asyrylǵanyn atap ótti. Nátijesinde sońǵy ýaqytta qatysýshy memleketterdiń uiym qyzmetine múddeliliginiń aitarlyqtai ósýi baiqalady.
Sonymen qatar, Dostastyqqa qatysýshy memleketter basshylarynyń nusqaýlaryna sáikes TMD elderiniń ekonomikalyq saladaǵy ózara is-qimylyn jandandyrý qajettiligi atap ótildi.
Qazaqstan SIM basshysy sondai-aq Tájikstan Respýblikasynyń 2018 jyly Dostastyqtaǵy tóraǵalyǵynyń qorytyndysyna joǵary baǵa berip, onyń óte mazmundy jáne jemisti bolǵanyn atap ótti. Oǵan qosa, Qazaqstan tarapy Túrikmenstandy uiymǵa tóraǵalyqtyń qabyldanýymen quttyqtap, túrkmen tarapy usynǵan tóraǵalyq tujyrymdamasyn tabysty iske asyrýǵa jan-jaqty járdemdesýge daiyn ekendigin bildirdi.
Otyrys barysynda delegatsiia basshylary qabyldaý bastamasy túrkimen tarapyna tiesili TMD-ǵa qatysýshy memleketterdiń syrtqy saiasi vedomstvolary arasyndaǵy áriptestikti jandandyrý jónindegi is-qimyl baǵdarlamasynyń jobasyn qarap, irgeli zertteýler salasyndaǵy memleketaralyq qatynastardy úilestirý týraly, murajai isi salasyndaǵy yntymaqtastyq týraly, sondai-aq TMD joǵary organdarynyń - Memleket basshylary keńesiniń jáne Úkimet basshylary keńesiniń aldaǵy otyrystaryna engiziletin bas bostandyǵynan aiyrýmen bailanysty emes jazalardyń oryndalýyn berý týraly halyqaralyq sharttardyń jobalaryn maquldady.
Syrtqy ister ministrleri 1941-1945 jylǵy Uly Otan soǵysynyń áskeri jerleý oryndary men áskeri eskertkishterine tiisti kútim jasaý jáne saqtaý qajettiligi týraly Úndeý qabyldady, sondai-aq ekinshi dúniejúzilik soǵys bastalýynyń 80 jyldyǵyna bailanysty TMD-ǵa qatysýshy memleketter basshylarynyń málimdemesiniń jobasyn maquldady.
TMD Syrtqy ister ministrleri keńesiniń kezekti otyrysy Ashhabadta 2019 jyly 10 qazanda ótedi.
