Ózbekstan azamaty Máskeýde áskeri komissariattan shaqyrtý aldy. Bul týraly Mediazona Central Asia habarlady, dep jazady Massaget.kz portaly.
"Men Máskeýde turamyn, biraq eshqashan Resei azamaty bolǵan emespin. Tiisinshe, mende eshqandai áskeri esep joq. Ózbekstan elshiligine habarlastym, olar maǵan kelip aryz jazýymdy surady, sonymen qatar shaqyrtý boiynsha eshqaida barmaitynymdy eskertti", - dedi Siroj Nabiev.
Basylymnyń habaryna qaraǵanda, bul - Reseide sheteldikterdi áskerge shaqyrtqan alǵashqy oqiǵa emes. Qazan aiynyń basynda Peterbýrgte Qazaqstan azamatyn áskerge shaqyrý áreketi bolǵany habarlanǵan. Jergilikti áskeri komissariat shaqyrtý qaǵazynyń "qatelikten" shyqqanyn moiyndaǵan.
Buǵan qosa, BAQ Vladimir Pýtin jariialaǵan "jartylai" mobilizatsiiadan keiin Sankt-Peterbýrgten Vladivostokqa deiin Reseidiń ártúrli qalalarynda turatyn júzdegen tájikstandyqtyń áskerge shaqyrtý alǵanyn habarlady.
Buǵan deiin Máskeý oblysynyń Podolsk qalasynda Ózbekstan azamatyna áskeri komissariatqa kelýdi talap etken shaqyrý qaǵazy tapsyrylǵany da belgili bolǵan.
