Máskeýde mektep oqýshylary 5-18 qazan aralyǵynda demalysqa jiberiledi, dep habarlaidy "Ult aqparat" TASS agenttigine silteme jasap.
«Qyzmeti men quzyretin Máskeý qalasynyń atqarýshy organdary júzege asyratyn jalpy bastaýysh, jalpy negizgi, jalpy orta, qosymsha bilim beretin jáne sporttyq daiyndyq uiymdarynyń oqýshylary úshin kanikýl 2020 jyldyń 5 qazanynan bastap, 18 qazandy qosa alǵandaǵy aralyqta belgilensin», - delingen qujat mátininde.
Máskeý meri Sergei Sobianin óz blogynda málim etkendei, bul rette qaladaǵy balabaqshalar burynǵy rejimde jumys isteýin jalǵastyra beredi. Qujatta atap ótilgendei, dúisenbiden bastap balalardyń bos ýaqytyn uiymdastyrýǵa arnalǵan mekemelerge barý eki aptaǵa toqtatyldy.
«Qazannyń 5-inen bastap Máskeýdiń kóptegen mektepterinde josparly kúzgi kanikýl bastalady. Taǵy biraz mektepte olar sál keiinirek bastalyp, ádette bir aptaǵa sozylady. Sanitarlyq dárigerlerdiń keńesi boiynsha, kúz mezgilinde tumaý aýrýynyń órshýi sebebimen jáne kovid virýsyna shaldyǵý oqiǵalary ósimin esepke ala otyryp, men kúzgi kanikýldy eki aptaǵa deiin sozý sheshimin qabyldadym», - dep túsindirdi óz sózinde Máskeý meri.
25 qyrkúiekte Máskeý biligi 65 jastan asqandar men sozylmaly aýrýmen aýyratyndar jáne aiaǵy aýyr áielderge úiden shyqpaýǵa keńes bergen. Qala meri úiden shyqqan zeinetkerlerge aiyppul salmaýǵa da ýáde bergen. Iri kásiporyn qyzmetkerlerine qashyqtan isteýge keńes berildi. Máskeýde dúkender men qoǵamdyq kólikte adamdar maska taǵyp júrýge mindetti.
"Otkrytye media" saitynyń jazýynsha, koronavirýs infektsiiasyn juqtyrǵandar sanynyń kóbeiýine bailanysty Resei biligi karantin sharalaryn engizý máselesin talqylap jatyr. Eger bir kúnde anyqtalǵan naýqastar sany 10 myńnan assa jáne jańa naýqastar sany jazylǵandardan kóp bolsa, karantin engiziledi.
28 qyrkúiekte Reseide bir kúnde 8135 adamnan koronavirýs tabylǵan. Maýsym aiynan beri bir kúnde osynsha kóp naýqas anyqtalmaǵan. Bir kúnde 61 adam koronavirýstan qaitys bolǵan. Indet bastalǵaly beri 20 385 adam kóz jumǵan. Virýs juqtyrǵandardyń jalpy sany 1,2 mln-nan asqan. Resei koronavirýs aýrýyna shaldyqqandar sany jaǵynan álemde AQSh, Úndistan, Braziliiadan keiin tórtinshi orynda tur.
