Máskeýdegi narazylyq aktsiiasy kezinde politsiia Aleksei Navalnyidyń áieli Iýliia Navalnaiany ustady. Bul jóninde saiasatkerdiń zaiyby Instagram paraqshasynda jazdy.
"Nastoiashee vremia" tilshisiniń habarlaýynsha, Navalnaiany Máskeýdiń Bolshaia Dmitrovka kóshesiniń mańynda ustaǵan.
22 qańtarda Iýliia Navalnaia alańǵa shyǵatynyn aitqan. "Men qaitpas qaisar, batyl azamat úshin [alańǵa] shyǵamyn, ony ýlap, óltirýge tyrysyp jatyr, al ol soǵan qaramastan eshteńeden qaimyqpai júr. Ózim qatty jaqsy kóretin adam úshin shyǵamyn" dedi ol.
Navalnyidyń áieli buryn kóbine tek ruqsat etilgen sharalarǵa ǵana qatysyp júretin.
Tilshiler Máskeýdegi Pýshkin alańynan Alekseidiń jáne qazir qamaýda otyrǵan Oleg Navalnyidyń anasy Liýdmila Navalnaiany da baiqaǵan.
Budan buryn politsiia Pýshkin alańynan "Jemqorlyqpen kúres" qorynyń zańgeri Liýbov Soboldi ustap áketken.
"Nastoiashee vremia" Soboldi ustaǵan sáttiń videosyn Twitter paraqshasyna saldy.
Resei ishki ister ministrliginiń málimeti boiynsha alańǵa tórt myńdai adam jinalǵan.
Shara ótetin ýaqytqa bir saǵat qalǵanda-aq Pýshkin alańy adamǵa toly boldy. Tverskaia kóshesiniń eki jaǵynda da adam kóp.
- Oppozitsiiashyl saiasatker Aleksei Navalnyidyń jaqtastary ony qoldaý úshin 23 qańtarda jalpyulttyq qarsylyq aktsiiasyn uiymdastyryp jatyr. Eldiń túkpir-túkpirinde myńdaǵan adam qatysqan mitingiler ótip, júzdegen adam ustaldy.
- "Novichok" ýymen ýlanyp, aýrýhanaǵa túsken Aleksei Navalnyi Germaniiada emdelip, 17 qańtarda Reseige kelgen bette Máskeý áýejaiynda ustalǵan.
- Qiyr Shyǵys pen Sibirde myńdaǵan adam qatysqan mitingiler ótti. Máskeýdiń Pýshkin alańynda, Sankt-Peterbýrgtyń Senat alańynda jiyn áli jalǵasyp jatyr. Politsiia shara bastalmai jatyp belsendilerdi ustaýǵa kóshken.
