18 qańtarda kúndiz Máskeý túbindegi Himki eldi mekeninde Kreml synshysy Aleksei Navalnyi isi boiynsha sot tyńdaýy bastaldy. Bul týraly saiasatkerdiń baspasóz hatshysy Kira Iarmysh habarlady, dep jazady Azattyq.
Twitter-de jariialanǵan videoda Navalnyi ózin Himki politsiiasyndaǵy kameradan "advokatpen kezdestirý úshin" shyǵaryp, birden sot zalyna kirgizgenine narazy bolady.
"Politsiia bastyǵynyń ótinishi boiynsha meni qamaýǵa alý máselesi qaralaiyn dep jatyr. Himki soty ne úshin politsiiada ótip jatyr? Nege [sot jaily] eshkimge habarlamaǵan? ... "Býnkerdegi atanyń" dirildep qaltyraityny sonsha Qylmystyq kodeksti jurttyń kózinshe jyrtyp, qoqys jáshigine laqtyra salǵan siiaqty. Bul zańsyzdyqtyń soraqy túri. Basqasha aitý múmkin emes" dedi Navalnyi. Odan keiin jariialaǵan videoda Navalnyi sot protsesine jýrnalisterdi kirgizýdi talap etedi.
Aleksei Navalnyi 17 qańtarda keshke Germaniiadan Máskeýge ushyp kelgen. Máskeýdiń Sheremetevo áýejaiynda kúshtik qurylymdar ony birden ustady.
Zańgerler 18 qańtarda ózderin politsiiaǵa kirgizbei jatqanyn, oppozitsiialyq saiasatkerdiń jaǵdaiynan habarsyz ekenin málimdegen.
Resei qylmystyq jazany atqarý federaldyq qyzmeti (FSIN) Navalnyidy ustaǵanyn rastady. FSIN habarlamasynda Navalnyi 2014 jyly shyqqan sot úkimi boiynsha shartty jazany oryndaý erejelerin "birneshe ret" buzdy, "baqylaý inspektorlarynan jaltardy" dep jazylǵan.
Zańgerler Navalnyidy "shartty jazany oryndamaǵany úshin" 3,5 jylǵa sottaýy múmkin ekenin aitady.
Navalnyi 2014 jyly 30 jeltoqsanda 3,5 jylǵa shartty túrde sottalǵan. Oǵan "alaiaqtyq" baby boiynsha aiyp taǵyldy. Navalnyi taǵylǵan aiypty joqqa shyǵardy. Quqyq qorǵaýshylar istiń saiasilanǵanyn aitqan.
17 qańtarda halyqaralyq Amnesty International uiymy Aleksei Navalnyidy ar-ujdan tutqyny dep atap, Máskeýden ony dereý bosatýdy talap etti. AQSh jáne Eýroodaq Reseige soǵan uqsas talap qoidy.
Reseidiń oppozitsiialyq saiasatkeri ótken jyldyń tamyzynda Tomskiden Máskeýge jol tartqan ushaqta háli kúrt nasharlap, esinen tanǵan. Ushaq ekipajy shuǵyl túrde Omby qalasyna qonyp, sol jerden ony jedel járdem qyzmeti jergilikti aýrýhanǵa alyp ketken. Eki kúnnen soń ol es-tússiz kúii Germaniiaǵa jetkizilgen. Qyrkúiektiń basynda Germaniia úkimeti Navalnyidyń denensinen "Novichok" ýynyń izin anyqtaǵan. Keiinirek táýelsiz zerthanalar saiasatkerden alynǵan úlgide ýdyń baryn rastaǵan.
Navalnyi ózin ýlaýǵa Kremldiń tikelei qatysy bar dep sanaidy. Al Kreml muny joqqa shyǵarady.
