Máskeýde qazannyń 18-i kúni Ózbekstannyń tuńǵysh prezidenti Islam Karimovke ornatylǵan eskertkish ashyldy. Eskertkish 15 qazanǵa qaraǵan túni Máskeýdiń ortalyq Iakimanka mýnitsipaldyq okrýgindegi Karimov saiabaǵynda ornatylǵan.
Azattyqtyń Orys redaktsiiasynyń habarlaýynsha, eskertkishtiń ashylý saltanatynda kúzet kúsheitildi. Politseiler qorshaýǵa alǵan saiabaqqa jýrnalisterdi tizimmen ǵana kirgizdi.
Sharaǵa Resei men Ózbekstan biliginiń ókilderi qatysty. Jiynǵa qatysqandar Islam Karimovti "kórnekti tulǵa" dep atap, onyń Ózbekstanda "túrli-tústi tóńkeristiń bolýyna jol bermegenin" aitty.
Biyl qańtarda Iakimanka okrýginiń depýtattary Islam Karimovtiń eskertkishin ornatýǵa qarsy shyqqan. Resei liberal-demokratiialyq partiiasynyń ókilderi Karimovti Ózbekstandaǵy orystildi turǵyndarǵa qatysty jaýlyq tanytty jáne elde sovet muralarynan arylý saiasatyn júrgizdi dep aiyptap, eskertkish ornatýǵa qarsy petitsiiaǵa qol qoiýǵa shaqyrǵan.
Máskeý biligi Karimovke eskertkish ornatý jónindegi referendým ótkizý jobasyn qabyldamai tastaǵan.
Islam Karimov Ózbekstandy 1989 jyldan beri basqarǵan. Ol 2016 jyly 2 qyrkúiekte 78 jasynda insýltten qaitys boldy. Quqyq qorǵaýshylar Islam Karimovti osy zamandaǵy eń qatygez diktatorlardyń biri dep sanaidy. Olar Karimovti Ózbekstanda adam quqyǵyn jii buzdy, eldegi kez-kelgen oppozitsiialyq kóńil-kúidi tunshyqtyryp otyrdy jáne 2005 jyly mamyrda Ándijanda bolǵan tártipsizdik kezinde júzdegen adamnyń ólimine kináli dep aiyptaidy.
