Máskeýdiń ońtústiginde gaz qoimasynan órt shyqty, dep habarlady TASS agenttigi jedel qyzmettegi derekkózge silteme jasap.
«Gazoprovod 4a kóshesindegi gaz rezervýary ornalasqan qoimada órt shyqty. Qoima ishinde jarylys daýystary estilip jatyr», - dedi agenttikke derekkóz.
Órtke qaýiptiń «joǵary» deńgeii berilip otyr. Jarylystyń oryn alý múmkindigine bailanysty oqiǵa ornyna jetken órt sóndirýshiler qaýipsiz araqashyqtyqty saqtaýda.
«Qoimadaǵy gazǵa arnalǵan rezervýardyń jalpy kólemi 600 tekshe metrdi quraidy», - delingen TASS-qa berilgen málimette.
Órtke oranǵan qoimada birneshe qýatty jarylys oryn alǵan. Sol sebepti qazirgi ýaqytta órt sóndirýshiler brondalǵan qorǵanystyń jetkizilgenin kútip tur.
RF TJM Máskeý qalalyq basqarmasynyń baspasóz qyzmeti de órttiń oryn alǵanyn rastady.
«Qoima ǵimaratynda órt bolyp jatyr. Aldyn ala boljamǵa sáikes, onyń ishinde gaz ballondary bar. Neniń órtenip jatqany jáne qyzyl jalyn sharpyǵan aýmaq naqtylanýda. Zardap shekkender joq», - dedi qalalyq basqarmadan.
Gaz ballondary bar qoima ǵimaratynyń qiraǵany da belgili bolyp otyr.
«Ballondar saqtalǵan ǵimarat qiraǵan. Órtten qorǵaý qyzmetiniń jeke quramy tehnikalyq qaýipsizdik erejelerin saqtai otyryp, qyzyl jalynmen kúres júrgizip jatyr. Zardap shekkender týraly aqparat túsken joq. Mamandar men tehnika jetkilikti», - dedi RF TJM Máskeý qalalyq basqarmasynan.
Al TASS agentiginiń jedel qyzmettegi derekkózi ǵimarattyń jarylys saldarynan qiraǵanyn aitady. Sonymen qatar ol tótenshe jaǵdai oryn alǵan aýmaqqa jaqyn ornalasqan úilerdiń turǵyndaryn evakýatsiialaý júrgizilmegendigin atap ótedi.
«Órt qushaǵyna oranǵan angarǵa taqaý ornalasqan turǵyn úilerden adamdardy qaýipsiz jerge shyǵarý júrgizilgen joq. Kólik qozǵalysyna shekteý engizilgen», - dedi ol.
