Máskeýdegi Tretiakov galereiasynda "Qazaq handyǵy. Almas qylysh" filminiń arnaiy kórsetilimi boldy.
Kórsetilim aiasynda qazaqstandyq jýrnalisterge suhbat bergen kartina rejisseri Rústem Ábdirashovtiń aitýynsha, bul týyndy búginde tek Qazaqstanda ǵana emes sonymen birge shetelde de tanymal bolyp kele jatyr.
"Bul "Qazaq handyǵy. Almas qylysh" filminiń sheteldegi alǵashqy kórsetilimi. Degenmen, filmniń orys tilindegi nusqasyn YouTube-ke salǵan edik jáne ol bir aidyń ishinde millionnan astam kórilim jinap otyr. Biz úshin bul óte úlken kórsetkish. Filmge oń baǵa berilýde jáne álemniń túkpir-túkpirinen, Túrkiiadan, Reseiden, Aýǵanstannan, Irannan, Latyn Amerikasy elderinen jaqsy pikirler túsýde. Túrli elderdiń azamattarynyń qazaqtyń, túrkilerdiń tarihyna, jalpy kóshpelilerdiń órkenietine qyzyǵýshylyq tanytyp otyrǵandyǵy qýantady. Óitkeni, tarihy 550 jyldan asyp jyǵylatyn Qazaq handyǵynyń, uly kóshpeli túrki órkenietiniń tarihtaǵy orny erekshe. Sonymen qatar ol búkálemdik órkeniettiń de damýyna aitarlyqtai úles qosatyndyǵy belgili", – dedi Rústem Ábdirashov.
Osy rette ol filmniń birinshi bólimi úlken jobanyń bastamasy ǵana ekendigin basa aitty. "Taiaýda ǵana "Almas qylyshtyń" jalǵasy sanalatyn "Qazaq handyǵy. Altyn taq" dep atalatyn ekinshi bóligin túsirýdi aiaqtadyq. Jaqyn arada onyń tusaýkeseri ótedi. Sondyqtan muny úlken jobanyń bastaýy ǵana desek te bolady", – dedi ol.
Týyndy prodiýseri Arman Asenov qazaq filmin búginde sheteldik kórermender tanymal "Taqtar oiyny" serialymen salystyryp jatqandyǵyn basa aitty. "Bul filmdi 180-nen astam el satyp alýǵa qyzyǵýshylyq tanytyp otyr. Ol birinshi jáne ekinshi maýsymdaǵy 10 seriia men 2 kino nusqany qamtidy. Aita keterligi, eń aldymen Latyn Amerikasy elderi qyzyǵýshylyq tanytýda. Olar bul týyndyny "Taqtar oiynymen" salystyrýda", – dedi ol.
Tarihi jobanyń avtory – QR Prezidenti N. Nazarbaev. Film QR Mádeniet jáne sport ministrliginiń tapsyrysy boiynsha Sh.Aimanov atyndaǵy "Qazaqfilm" AQ "Centaurus Rustem Abdrashev production" JShS-nyń qatysýymen túsirilgen. Film stsenariiin jazýshy Smaǵul Elýbai Iliias Esenberlinniń "Almas qylysh" romanynyń jelisi boiynsha daiyndaǵan. Túsirý jumystary Almaty qalasy jáne Almaty oblysy aýmaǵynda, jarty bóligi "Qazaqfilm" kinostýdiiasynda jasalǵan dekoratsiiada ótken. Onda sýretshiler Shaibanshahtyń saraiyn jasaǵan.
"Almas qylyshty" túsirýge eki jyl ýaqyt ketken. Filmge 500 adam tartylǵan. Onyń 200-i túsirilim tobynyń músheleri. Naqty túsirý jumystary 30-ǵa jýyq nysanda bes ai boiy júrgen. Film biýdjeti 2 mlrd teńgege jetken. Salyqtarymen eseptegende 5 mln dollar jumsalǵan.
